Ramri-a insumdawntawnna chungchang ah Minister pahnih ten thuthar thehdarhtute an kawm

Ramri-a insumdawn tawnna tur thlithlaia Mizoram-a tlawha lo zin Bangladesh Commerce Minister Tipu Munshi leh Mizoram State sawrkar aiawhin Commerce & Industries Minister Dr. R. Lalthangliana te chuan nimin khan Secretariat Conference Hall-ah thuthar thehdarhtute an kawm.

Thuthar thehdarhtute an kawmna ah hian Bangladesh Commerce Minister Tipu Munshi chuan, Bangladesh sawrkarin Mizoram nena ramri-a insumdawn tawnna chu a duh tak zet thu leh tha taka kalpui tuma ruahmanna an siam thu a sawi a. Ram pahnihte chu insumdawn tawnna mai piah lamah, a mihring chengte in unauna chu an duh ber tih sawiin, an ramchhung ah Mizo thahnem tak awmin, Bangladesh leh Mizote hian inkungkaihna thuk tak an neih tih a sawi bawk.

Bangladesh Commerce Minister hian Mizoram atangin Aieng, Sawhthing, Hmarcha leh Lungchang (stone) te chu lakluh an duh tur thil a nih thu a sawi a. Lungchang bik hi an ram in an neih mang loh thil a nih avangin Bhutan leh Bihar atanga an lakluh reng thu leh a hautakin senso a tam hle tih a sawi a. Ramri intawm India hmarchhak atanga he'ng lungchang te hi lakluh theih a nih chuan a hautak loh zawk tur thu sawiin, “Hmalakna nei turin kan bawhzui dawn a, kan Prime Minister hnenah pawh thlen thuai a ni ang,” a ti. Tipu Munshi hian cement leh steel te bakah thawmhnaw leh plastic lamah pawh Bangla-desh-in Industry lian tham a neih avangin insumdawn tawnnaa a tel theih a beisei thu a sawi bawk.

Tui kawng hmang tangkaia insumdawn tawnna pawh kalpui theih tura hmalak an tum thu sawiin, hemi chungchangah Mizoram Chief Minister nen an sawi dun tawh thu a sawi a. “Mizoram Chief Minister nena kan inkawmna ah, Chittagong Port atanga Mizoram lo thlen theihna turin ngaihtuahna pawh sen a tul thu kan sawidun a. Kan River System chungchang hi chu kan Port Minister hnenah a rang lama thlen tum a ni bawk,” a ti.

Mizoram leh Bangladesh insumdawn tawnna tur atana pawimawh Border Haat chungchang pawh sawiin, hmalakna kal mek a nih thu a sawi a. Bangladesh lamah Land Custom Stations (LCS) chu chak taka hmalak mek a nih thu leh, Mizoram lamah pawh Integrated Check Post (ICP) chu tunah hian hmalakna kal mek a niin, a rang lama puitlin thuai a beisei tih a sawi.

Kum 2020 atang tawha ICP Kawrpui-chhuah awmna hmun tur tihfel tawh, tun thlenga puitlin a nih loh chhan zawhna chhangin Tipu Munshi chuan, “A puitlin lawk theih loh dan hi a chhan a inang lo ang. Keini lamah chuan chak taka hmalak mek zel a ni a. Mizoram state sawrkar pawhin sawrkar laipuiah an bawhzui reng niin a lang,” a ti a. Hemi chungchangah rawn sawi fiahin Commerce & Industries Commissioner Esther Lal Ruatkimi chuan, “ICP hi sawrkar laipuia Ministry of External Affairs project a ni a. Chutih laiin, State sawrkar pawhin formal takin a bawhzui ve mek zel a, hmasawnna a awm mek zel a ni,” a ti.

Mizoram State Commerce & Industries Minister Dr. R. Lalthangliana pawhin, tun dinhmunah ramri-a insumtawnna turin Bang-ladesh lam chuan Silsuri lamah pawh Mizoram thlengin kawngpui an laih tlang tawh bakah, black topping pawh tih vek a nih tawh thu a sawi a. Mizoram lamah erawh Pukzing atangin kawng awm chu siam fe erawh a ngaih tur thu sawiin, hemi chungchangah Chief Minister pawh a sawipui tawh thu leh rang taka siam thuai a ngaih tur thu a sawi a, hmalakna dang te pawh a sawi lang bawk a ni.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result