Latest News

MLA Fund hi mipui ta a ni a, dik taka hman a nih chuan hna tam tak a thawh theih - Lalduhoma

Serchhip bialtu MLA Lalduhoma chuan Serchhip bial chhunga MLA Fund hmanna tam zawk chu tha tak taka thawh anih avanga lawmthu sawiin, “MLA Fund chu mipuite ta a ni a, dik taka hman chuan hna tam tak a thawh theih a ni,” a ti.



Serchhip bialtu MLA Lalduhoma hian MLA Fund a pek atanga Serchhip Vengchung Branch Mizoram Upa Pawl (MUP) ten MUP Run an sak chu nimin khan hawngin MLA Fund chu mipuite ta anih thu leh dik taka hman chuan hna tam tak a thawh theih a ni tih sawiin, COVID-19 hri leng avanga tum dang anga MLA Fund an indaihloh thu leh dilna lut zawng zawng a daih vek takloh thu te, a daih chin chinah MLA Fund chu hman anih thu leh, a bial chhunga a MLA Fund hmanna hrang hrang a hmuhin hna tha tak taka thawh a ni chu lawmawm a tih thu a sawi a, a bial chhunga MLA Fund hmanga hnathawhte chu a chhe tur a ni lo tih a sawi a. He huna kalkhawm MUP member te chu Upa Pawl member nih theihna chu Pathian malsawmna a ni tih sawiin, MUP Run tha tak an nei ta chu a lawmpui thu a sawi bawk a ni.

Serchhip District-ah sum tam tak senga hnathawh, hmanzui tak loh engemawzat a awm thu pawh bialtu MLA chuan tarlangin, tul lova pawisa tam tham tak luanralna uihawm tak a ni tih a sawi a, heng zingah hian Slaughter House, Cold Storage bakah Nursing School te hmanzui tlakloha a awm thu sawilangin, Chhiahtlang-a Polytechnic sak te pawh a puitlin hleihtheihloh thu a sawilang bawk a. District zawng zawnga District Hospital nei chhe ber kan ni tih sawiin, Company sum cheng vbc. 21 chuang senga Hospital building thar kan nei tur chu a lawmawm hle a ni, a ti a. Govt. Serchhip College Building chungchang sawi langin Bye-election laia Sawrkar in a tiam tawh chu tun thlengin pawisa an la dawnloh thu leh, tunhnaiah Chief Minister Zoramthanga’n NAAC Grade 'A' Acreditation an hmuh a lawmpuina a cheng nuai 600 chuang building thar sak nan a tiam leh ta chu an hmu ngei tawh tura a ngaih thu a sawi bawk.

Serchhip Bialtu MLA chuan MLA Fund hmanga Govt. Serchhip College-a Career Coaching Centre hawn anih tur thu sawiin, Serchhip Kawlri tlang-a Mizo Cultural Heritage Centre sakna turin NEC atanga cheng nuai 486 an dawn thu leh tha taka hna thawh anih dawn thu a sawi a. Hemi chungchangah sawrkar lam pawhin an lawmpui an rin laiin ‘Mimal Project-a sum pek’ tia hekna a tawk ta zawk chu pawi a tih thu a sawi a, he hmalakna chhawrtu ber chu Serchhip mipuite an nih dawn thu pawh a sawi a. Heng bakah hian Vantawng Project pawh Central lamin an pawmpui tawh thu leh ropui taka tih tum anih thute sawi langin, Serchhip bial chhungah khualzin te tlawh duh tur thil pawimawh hrang hrang a awm thu a sawi bawk a ni.

Serchhip Vengchung Branch MUP ten MUP Run an sak hi Health Department ramchhunga sak niin Building sakna atan hian Serchhip Bialtu MLA hian MLA Fund atangin Rs. 4,00,000/- pein Rs. 4,61,987/- senga sak a ni a, a ban leh Beam te RCC hmanga sak niin a bang atan Tile leh a chung atan Rangva hman a ni thung a ni.

Nimin-a MUP Run hawnna hun hi Serchhip Vengchung Branch MUP President RL. Biak-vara chuan kaihruaiin Vanramnghaka, Treasurer hnen atangin Report ngaihthlak a ni a, MUP Serchhip District President CL. Ramngaia bakah Vanlalchhunga, Vengchung te hnen atangin thusawi ngaihthlak a ni bawk a, he hun hi tlawmngai pawl hruaitute pawhin an hmanpui bawk a ni.

Serchhip-a Local Cable TV pakhat, Lalro Digital chuan MUP Run-a dah tur hian TV pein kum khat chhung a thlawnin Cable TV Connection an pe dawn bawk a ni.

Comments

Popular News (Last 30 Days)