Building hlui chanchin ziahna CM in a tlangzarh

Mizoram-a building hlui ding lai chanchin ziahna, 'Built Heritage of Mizoram 2021' tih chu nimin khan Chief Minister Zoramthanga chuan CM Office Conference Hall-ah a tlangzarh.

INTACH Mizoram Chapter in an buatsaih 'Built Heritage of Mizoram 2021' tlangzarhna hunah hian Chief Minister chuan lehkhabu an tlangzarh chu a hlut thu leh thangthar te tan pawha tangkai tak tur nia a hriat thu a sawi a. Pipute sulhnu vawnhim lamah pawh rilru a harh tharin, nungcha, thing leh mau humhalh nachang te pawh kan hre zel a. Hei hian a tha lama hnam hma kan sawnna a tilang a ni, a ti a. Harsa tak chunga INTACH member te thahnemngaihna avanga an hmalakna leh sawrkara an thawhpui Art & Culture te hmalakna zel turah duhsakna a hlan a ni.

He hunah hian INTACH (MC) Member Secretary Lalram Thanga chuan lehkhabu tlangzarh tak chungchang sawiin Mizoram hmun hrang hranga sawrkar pisa te, Kohhran biak In leh mimal In hlui, kan rochunte chu Archaeological Survey of India in kum 2010 a kaihhruaina a duan, 'National Mission on Monuments and Antiquities' a siam zulzuiin kum 1950 hma lam a mi chauh telh a nih thu a sawi a. Kum 2014 khan he 'listing' bu hi siam a lo ni tawh a ni.

Tun lehkhabu tharah hian building hlui 71 tarlan a ni a (a hluiah 88); chung zinga 17 te chu Assam Rifles enkawl lai mek leh an awmna chhunga mi an ni a. A dang 14 chu Kohhran hrang hrang PCI, BCM, ECM leh SA te hnuaia enkawl niin 27 chu sawrkar building an ni a, a bak 13 te hi mimal ta a ni. Heng building hlui 71 te hi District paruk, Aizawl, Lunglei, Khawzawl, Kolasib, Serchhip leh Siaha-a mi te an ni.

Nimin a lehkhabu tlangzarhna hun hi Art & Culture Minister R. Lalzirliana pawhin hmanpuiin thu a sawi bawk a ni.