Excise & Narcotics Department in kum liamta ah Chhiah chi hrang hrang Rs. 1,79,92,165/- zet an hmu

Mizoram sawrkar-a Excise & Narcotics Department chuan sawrkar kum kalta chhung khan Zu leh ruihhlo chi hrang hrang tam tham tak manin Chhiah Rs. 1,79,92,165/- zet an hmu bawk.

Sawrkar kum kalta April 1, 2021 atanga March 31, 2022 chhung khan Excise & Narcotics Department hian tualchhung siam Rakzu litre 51,301.407 zet manin Zu bilhlai Tin 130,415 zet an tichhe bawk a, Dawidim/Yeast kg. 646.68 zet an man bawk a ni. Hemi chhung hian State pawn siam Zu (IMFL) um puitling 13,406 zet an man bakah a chanve um 1128 an man bawk a, Quarter bur pawh um 80 manin Beer bottle 140 leh canned Beer 8554 zet an man bawk a ni. Heng bakah hian rampawn atanga lakluh Zu um 1801 manin Beer bottle 9 leh Canned Beer 9574 an man bawk a, Zu siamna atana hman chi Bel pawh 943 manin Plastic Bur 10 an man bawk. Hemi hun chhung vek hian BEDC pawh litre 1191.9 zet an man bawk a, Wine pawh tam tham tak man an nei bawk.

Ruihtheih thildang pawh hemi chhung hian Excise & Narcotics Department hian man bawkin Heroin kg. 18.466 zet man a ni a, Ganja kg. 366.548 leh Methamphetamine kg. 35.935 man a ni bawk a, Nitrazepam tablet 238 manin Alprazolam tablet 3350, Clonozepam tablet 80, Tramadol tablet 2120, Buprenorphine tablet 73 leh Cough Syrup 1784 an man bawk a ni. Heng Zu leh ruihhlo kaihhnawih ah hian Two Wheeler 27, Three Wheeler 15, LMV 65, MMV pakhat leh HMV 5 man a ni bawk.

Sawrkar kum liamta chhung khan NDPS Act 1985 hnuaiah thubuai 371 ziahluh niin mi 517 man an awm a, MLP Act, 2019 hnuaiah thubuai 3015 ziahluh ni bawkin mi 2425 man an ni bawk a, ME Act, 1973 hnuaiah thubuai 192 ziahluh niin mi 193 man an awm bawk a, heng bakah hian ramdang mi 17 zet man an nei bawk a ni.

Heng bakah hian Foreign Liquor & Spirit hnuaiah Excise & Narcotics Department hian Chhiah Rs. 1,42,56,855/- zet hmu bawkin Fines & Confiscation atangin Rs. 29,00,810/- an hmu bawk a, heng bakah hian Chhiah dang atangin Rs. 8,34,500 an hmu bawk a, sawrkar kum liamta chhung khan Chhiah chi hrang hrang atanga an hmuh Rs. 1,79,92,165/- chu sawrkar sum bawm ah an chhunglut bawk a ni.