Hri kai thar 107 leh dam 105 awm belh leh

Pathianni khan Mizoram-ah Sample 299 enfiah niin COVID-19 hri kai mi 107 zet hmuhchhuah an ni a, Sample enfiah atanga za zela 35.79 te chuan hri an kai a ni.

Pathianni khan Mizoram-ah Sample enfiah zawng zawng hi Rapid Antigen Test hmanga enfiah vek niin Mamit District-ah hri kai mi 76 zet hmuhchhuah leh an ni a, a tam zawk chu Lungphun khua a mi te an ni. Heng bakah hian Saitual District-ah hri kai mi 12 hmuh niin Lunglei District-ah hri kai mi 10 hmuh an ni bawk a, Aizawl District-ah hri kai mi 9 hmuh an ni bawk a, District dang ah hri kai hmuh thar an awm lo thung a ni.

Nimin khan Mizoram-ah hri kai enkawl dam mi 105 an awm belh ve leh bawk a, heti hian nimin tlai dar 5:00 thleng khan Mizoram-a COVID-19 hri kai hmuhchhuah tawh chu 2,26,886 niin an zinga 2,25,596 te chu enkawl dam an ni tawh a, hri kai enkawllai 595 la awmin hri kai hmuhchhuah atanga chhutin za zela 99.43 te chu enkawl dam an ni tawh a, hri kai zingah mi 695 boral tawhin Siaha tihloh District dang zawngah hri kai enkawllai an la awm vek a ni.