Latest News

Super Specialty Cancer and Research Centre din dan tur JICA mithiam te nen sawiho a ni

Zemabawk-a Super Specialty Cancer and Research Centre din tur chungchang chu nimin khan Chief Minister Zoramthanga hovin sawrkar mi pawimawh te leh JICA-a mithiam ten an sawiho.

Chief Minister Office Cabinet Meeting Room-a he sawihona hunah hian Chief Minister chuan India State zinga Cancer vei tam ber nihna kan chang chu thil pawi tak, thlak danglam thuai ngai a nih thu sawiin, Cancer laka fihlim theih nan inzirtirna leh thil dang danga hmalak rualin damlo enkawlna tha, mahni kawtkaia pan mai tur kan din thuai chu a pawimawh takzet a ni, a ti a. Super Specialty Hospital chu kan mamawh hmasak ber te zing ami a nih avangin a tul ang te bawhzui zel a, a sak hna tan thuai turin Meeting a telte chu a chah a ni.

He hunah hian Health Minister Dr. R. Lalthangliana chuan Mizoram mipui mamawh em em leh hun engemaw chen ruahmanna lo awm tawh chu tun tuma Chief Minister thahnemngaihna leh hmalakna zara hlawhtlinpui a ni dawn ta chu lawmawm a tih thu sawiin, a sak hna tan thuai tura bawhzui ngai te bawhzui a nih tur thu a sawi bawk.

He thutkhawm ah hian Japan International Cooperation Agency (JICA) Hqrs. Tokyo atangin Kota Wakabayashi, Assistant Director, Division 1, South Asia Department leh Shinichiro Kato, Deputy Assistant Director, Division 1, South Asia Department, bakah Shusaku Takada, Representative, JICA India, New Delhi te an lo kal a. JICA lam mithiam te hian ruahmanna siam tawh te chu zirchiangin, siam danglam theih lai ni awma an hriat te he hian enho a ni a. Damlo tana hmun him leh muanawm a nih chu an ngaihpawimawh thu leh, Human Resource Development an ngaihpawimawh thu an sawi a. He project hnuaiah hian building sak ngawr ngawr bakah ‘Soft Component’ an tih - Training pek te, inhrilhhriatna te, mipui-a Cancer Screening neih leh zirchianna neih chu pawimawh an ti a. Mizoram Cancer Case dinhmun enin he ‘Soft Component’ hi ngaihpawimawh tel ngai nia an hriat thu an sawi a ni. JICA sum bultuma Super Specialty Cancer and Research Centre dinna tur hian sawrkar laipui-a Ministry hrang hrangte chu tun dinhmunah hian a paltlang tawh a ni.

Comments

Popular News (Last 30 Days)