Biate tuilakna hawn a ni

North Eastern Region Development Prog-ramme (NERDP)/10% Lump Sum Grant sum cheng nuai 1364.67 senga siam Khawchhak Tuipui atanga Biate khua chawm tur tuilakna, Biate Water Supply Scheme (pumping) chu nimin khan Home Minister Lalchamliana'n a hawng.

Tuilak hawnna puala inkhawm ah Home Minister chuan Biate khua in tuilakna tha tak a nei thar chu thin-lung taka a lawmpui thu leh a ti hlawhtlingtu department thawktu leh contractor-te a lawmpui thu a sawi a. Tuilakna thar hawng theia a awm chu vannei hle a a inhriat thu sawiin, tha lo thawhtu zawng zawngte, sawrkar hmasa a bik takin PHE Department changtu Minister hmalakna ah bialtu MLA a nih angin lawmthu a sawi bawk.

He hunah hian PHE Serchhip WATSAN Division-a Sr. EE, Er F. Lalsanglura chuan Technical Report pe in Biate Water Supply (pumping) Scheme hi June ni 18, 2016 khan thawh tan a ni a, December ni 16, 2019 khan tui pump chhuah theiha siam niin, April ni 30, 2021 khan thawh zawh a ni. Tui connection hi In 550 thlenga pek theih tura ruahman niin Sawrkar laipuiin za zela 90, cheng nuai 1228.20 tumin State tum zat chu za zela 10, cheng nuai 136.47 a ni.

He tuilakna hmang hian mi pakhat in ni khat-ah tui litre 135 thlenga hmang anga chhutin mi 2619 te kum 2045 thleng chawmzo tura duan a ni a, ni khat-ah darkar 20 zel tui pump thei tura duan niin nitin tui litre nuai 4,10,000 pump thei tura duan a ni bawk.