Latest News

Bawrhsap in East Lungdar a sawrkar hmalakna a tlawh

Serchhip District Bawrhsap Nazuk Kumar IAS chuan nimin khan East Lungdar tlawhin an khua a sawrkar hmalakna thenkhat a tlawh.


District Bawrhsap hian School Chhawm rawh (Adopt a School) hnuaia Govt. Lungdar Middle School-II leh Govt. Lungdar Primary School-II a hmalakna te tlawhin School hotu ten an dawng-sawng a, E. Lungdar kawn atanga East Lungdar PHC inkar kawng, PWD ten  an tihzauhva an blacktop thar enin E. Lungdar PHC hmunhmate a tlawh leh bawk a. PHC panna kawng hi meter 850-a thui niin tunhmaa meter 3-a zau ni thin chu meter 3.75-ah tizauvin an blacktop nghal a, cheng nuai 36 an seng a ni

Bawrhsap hian East Lungdar PHC-a X-Ray khawl hman theih loha awm mek pawh a dinhmun thawktute a zawt nghal a, damdawi In Ward hrang hrang fangin thawktu ten fai taka an enkawl chu lawmawm a tih a tih thu a sawi bawk. Hei bakah hian MGNREGS sum hmanga East Lungdar tlang-a Open Theatre sak mek pawh tlawhin East Lungdar VC ten nen he tlang hman tangkai zel dan turte an sawiho bawk a, East Lungdar BDO Office sak mek pawh tlawhin he building sak hna hi hun reilote ah zawhfel theih tawh tura beisei a ni.

Nimin a heng hmun hrang hrang a tlawhna ah hian East Lungdar BDO H. Lalhruaitluanga leh Serchhip DIPRO K. Saitluanga bakah East Lungdar VC ten DC hi an tawiawm a ni.

Comments

Popular News (Last 30 Days)