Ram pahnih ten ramri-a insumdawntawn an rel

Mizorama rawn zin Bangladesh Commerce Minister Tipu Munshi leh Mizoram Commerce & Industries Minister Dr. R. Lalthangliana chuan nimin khan Aizawl-ah thuthar thehdarhtute kawmin ramri-a insumdawntawnna ah hmalak dun an rel.

Heng Minister pahnih ten thuchhuah intawm siama an tarlan danin Mizoram chhung Silsury leh Bangladesh ramchhung Sazek-ah te Bazar siam nise, hemi atan hian Bangladesh sawrkarin a kaldan tur dik takin phalna te pe se; insumdawntawnna mumal taka a kal theih nan leh venhimna kawnga hmalak a awlsam nan Kawr-puichhuah-a Mizoram sawkarin Integrated Check-post (ICP) a din ang chu a ep chiah, Bangladesh ramchhung Thegamukh-ah Bangladesh sawrkarin din ve se an ti a. Inkalpawhna tha zawk a awm theih nan Chhota Horin leh Thegamukh inkar kawng, kilometer 17-a thui chu Bangladesh sawrkarin siam tha se; India leh Bangladesh inkalpawhna atan Khawthlangtuipui chu hman ve ni se, Mizoram sawrkar pawhin Khawthlangtuipui-a ram pahnih inkalpawhna tur meter 660-a sei Lei dawh turin hma la se; insumdawntawnna tha taka kal mek hi a lo that lehzual theih nan hmun remchang lai laiah Bazar leh thil tul dang din dun zel ni se tihte a tel a ni.