Bangladesh leh Mizoram ramri-a insumdawn tawnna tur Minister pahnih ten an tlawh

Mizoram-a rawn zin Bangladesh Commerce Minister Tipu Munshi leh Mizoram Commerce & Industries Minister Dr. R. Lalthangliana te chuan Inrinni khan Silsuri - Sajek Border Haat siamna tur hmunhma leh Tlabung thlang Kawrpuichhuah-a Integrated Check Post (ICP) dinna tur hmun te an tlawh.

Heng Minister pahnih te hian Silsuri - Sajek Border Haat siamna tur hmunhma tlawh hmasa in hetah hian Bangladesh Commerce Minister chuan Border Haat, Bangladesh leh India insumdawntawnna tur chu ram pahnihte tana thil tangkai tak a nih dawn thu sawiin, he Border Haat hi peihfel thuai anih theih nan Bangladesh Sawrkar chuan chak taka hma an lak dawn thu a sawi a. Dr. R. Lalthangliana pawhin India leh Bangladesh insumdawntawnna tur Border Haat kan nei tur chu thil lawmawm tak a nih thu sawiin, MNF leh India Sawrkar inremna, Memorandum of Settlement-ah Border Haat kalpui tura ziahlan a nih angin chak taka hmalak tum a nih thu a sawi a. Mizoram atangin hralhchhuah tur thil chi hrang hrang, In sakna leh kawngpui siamna hmanrua Lung, Rawra bakah thlai thar chi hrang hrangte kan nei dawn a. Hei hian kan ram economy a tihsan dawn bakah kan ram tan hmasawnna nasa tak a thlen a beisei thu a sawi a ni.

Minister pahnihte hian Border Haat siamna tur lungphum an phum nghal a, Chittagong (Bangladesh) leh Aizawl (Mizoram) insumdawntawnna tur hia km 394 niin Minister te hi Bangladesh ramchhung Udaipur thleng Border Haat hmunhma enfiahin an kal bawk a ni.

Hemi hnu hian Minister pahnih te hian Bangladesh nena insumdawntawnna atana Integrated Check Post (ICP) dinna tur hmun, Tlabung thlang-a Kawrpuichhuah chu an tlawh nghal a, Kawrpuichhuah-a inkhawm tawi neih ah Bangladesh Commerce Minister Tipu Munshi chuan Mizoram nena insumdawntawnna tih hlawhtlin chu Bangladesh sawrkarin a ngai pawimawh takzet tih a sawi a, “ICP Kawrpuichhuah leh Silsuri, Tuipuibari, Nunsuri leh Marpara-a Border Haat te an nih tur anga tih puitlina kalpui an nih theihnan Bangladesh sawrkarin kan tih ve tur te rang thei ang bera umzui kan tum a ni,” a ti a. Ramri intawm kan nih angin inhriatthiam tawnna boruak tha hnuaia hmalak tlan zel a tul tih pawh sawiin, insumdawn tawnna kalpui chuan inlaichinna tha zawk a thlen ngei pawh a rin thu a sawi bawk.

ICP Kawrpuichhuah dinna tur hian kum 2005 khan M/s Rites Ltd. (Govt. of India Enterprise) ten Home Ministry hnenah an Survey Report thehlutin ICP dinna tur hian ram bigha 224.99 a zau lak a ni a. India leh Bangaldesh inkalpawhna ti awlsam tur hian Kawrpui lui (Theka)-h RCC Double Lane Bridge 660 metres a thui siam tum a ni bawk a. He RCC Bridge siamna tur hian Mizoram PWD chuan Sawrkar Laipui Ministry of External Affairs ah cheng vbc. 230.01 hu DPR chu January 17, 2020 khan anlo thehlut tawh a ni. He RCC Double Lane Bridge hmang hian awlsam zawkin Indo-Bangladesh insumdawn tawnna kalpui theih a ni dawn a, sawrkar laipuiah bawhzui mek niin Tlabung leh Kawrpuichhuah inkar kawng km 18 chu double lane black topping siam zawh a ni tawh bawk a ni.

Bangladesh nena insumdawntawn nana thil pawimawh zinga pakhat Trade Facilitation Centre chu Tlabung-ah sak zawh tawh a ni a, hemi sakna atan hian Mizoram sawrkar ngenna angin Critical Infrastructure Balance (CIB) Scheme hnuai atangin cheng nuai 118 chu sawrkar laipui Ministry of Commerce & Industry atanga hmuh a ni a. Tunah hian he building a taka hman theihna tur hian Mizoram sawrkarin hma la in cheng nuai 10 hmangin a chhunga hmanrua tur te lei khawm a thuamthat ani tawh bawk a. Lunglei leh Tlabung inkar km 100 chu survey zo in hna tan a ni tawh bawk a ni.

Comments

Popular posts from this blog

Eiruk thubuai-ah Serchhip-a Excise Office leh Treasury Office-a thawk thin thiamloh chantir an ni