BADP sum cheng nuai 50 senga Sailulak Community Centre sak belh Home Minister in a hawng

Border Area Development Programme (BADP) sum cheng nuai 50 senga Sailulak khuaa Community Centre sak chhunzawm chu nimin khan bialtu MLA leh Home Minister Lalchamliana chuan a hawng.


Community Centre hawnna hunah hian Home Minister Lalchamliana chuan a bial chhunga Sailulak khua in Community Hall bakah Community Centre an nei ta chu a lawmpui thu sawiin, khawtlang in mikhual te thlenna atana tangkai taka an hmang pawh an khaw tlawhtu mikhual te tan a tangkai lehzual dawn tih a sawi a. Sailulak atanga Tiau lui panna kawng chu MLA a tlin tirh atanga a rilru-a awm nghal a nih thu sawiin, a kawng hi a lo thui tham deuh si avangin hmalakna lian tham zawk mamawh a nih thu leh nawr tlang nghal mai a harsat rih thu a sawi bawk a ni.

Home Minister chuan COVID-19 hri leng avangin duh angin hmasawnna hna kalpui theih a ni lo tih sawiin, heti chung hian a bial chhunga khaw hrang hrangah hmasawnna hmuh tur a awm thu a sawi a. A bik takin Kawng, Tui leh Electric chungchangah nasa taka hmalak a ni tih sawiin, kawng chungchang bikah a bial chhunga kawng te a tha tlangpui tawh tih a sawi a, tuna kawng thalo chu Chekawn leh Artahkawn inkar a nih thu leh hei pawh hi lo thawh tan mai phalna sawrkar ah dil mek niin hun reilote ah tan theih beisei a nih thu a sawi a. Tui chungchangah a bial chhung khaw hrang hrangah nasa taka hmalak a nih thu sawiin, Biate Water Supply Scheme chu Vawiin ah hawn a nih dawn thu leh N. Mualcheng chu NABARD sum hmangin an tuilakna tur cheng nuai 880 sanction a ni tawh a, N. Vanlaiphai tuilak hna thawhna tur pawh hmuh tawh niin, khaw dangte pawh Jal Jeevan Missions hmalakna hmanga Functional Tap Water neihtir vek tuma hnathawh mek a nih thu a sawi bawk.

Community Centre Building sak thar hawnna hun hi East Lungdar BDO H. Lalhruaitluanga chuan kaihruaiin Sailulak VCP C. Zoramchhana chuan inlawmna thu a sawi a, he building hi an khua in mikhual an neih changa thlenna hmun atan an hman thin thu sawiin, tunah hian mi tlawmngai te thil pekkhawm hmanga an la kalpui mek thu leh tihchangtlun zel tum a nih thu a sawi a. An khua a School-ah thawktu indaihlohna a awm thu pawh sawiin, bialtu MLA hnenah hian SEDP atanga a theih anga zirtirtu pe turin a ngen bawk a ni.

He building hawn tak hi BADP sum cheng nuai 13 sengin chhawng khat sak a nih hnuah 2019-2020 BADP sum cheng nuai 50 hmangin chhawng thum sak belh leh a ni a, a chhawng hnuai pathum hi a dung ft. 30 leh a vang ft. 40 niin a chhawng chung ber hi ft. 36 leh ft. 30-a zau a ni bawk. He hna hi February 18, 2021-ah tan niin May 16, 2021-ah sak zawh a ni a, a chhawng hnuai ber hi mimal in luahin a chung chiah hi NRLM hnuaia Village Organization (VO) ten Office atan an luah a, a chung leh hi mikhual thlenna atan leh Myanmar atanga raltlan rawn lut te awmna atan hman mek a ni a, a chung ber hi puipunna neihna atana hman theiha dah a ni bawk.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result