Latest News

Serchhip Sub-Hqrs. YMA in YMA leh PWD te MoU ziah chu tihtawp a nih theih nan hmalak an rel

Serchhip Sub-Hqrs. YMA chuan nimin khan Serchhip Auditorium-ah Rorel Inkhawm vawi 3-na neiin an thurel zingah YMA leh PWD in Thawhhona Thuthlung, Memorandum of Understanding (MoU) an ziah chu tihtawp a nih theih nan hmalak ni rawh se an ti.


Serchhip Sub-Hqrs. YMA hian Conference neih loh kum-a an neih thin Rorel Inkhawm vawi 3-na hi nimin khan Serchhip Auditorium-ah neiin he hunah hian YMA leh PWD in June 14, 2018-a Memorandum of Understanding (MoU) an lo ziah tawh chungchang hi an sawiho a, he sawihona hunah hian PWD leh YMA te thawhdunna hnuaia harsatna an tawh te sawilan niin hnathawh thenkhat ah Agreement pawh an hmuh ve theih thin loh thu te, hnathawh vil kawngah PWD zawkin harsatna an siam zawk thin nia an hriat thu leh Joint Inspection neih an rawt thin te pawh tih hlawhtlin a nih ngai loh thu te sawilan a ni a, sawihona huamzau tak an neih hnuah Serchhip Sub-Hqrs. YMA Rorel Inkhawm chuan YMA leh PWD in Memorandum of Understanding an ziah chu tihtawp a nih theih nan hmalak ni rawh se, an ti a ni.

Hei bakah hian Sawrkar khawih an rel zingah Chawm Kai leh Zote South inkar kawng tha taka siam a nih theih nan Sub-Hqrs. YMA in hmalak leh Forest Department-in Lungpho-ah Range Office thar hawn a nih theih nan sawrkar-ah thlen te chu a tel a. YMA Khawih zingah Myanmar raltlan te enkawlna mumal leh khuahkhirhna fel tak siam a nih theih nana hmalak leh Nungcha humhalh kawngah chak lehzuala hmalak te an rel bawk a. Kum 2022-2023 chhunga Serchhip Sub-Hqrs. YMA Budget Rs. 10,58,700/- chu lungrual taka pass a ni bawk.

Nimin-a Serchhip Sub-Hqrs. YMA Rorel Inkhawm-ah hian chawhnu lamah Vantlang Inkhawm Sub-Hqrs. YMA Vice President Lal-rammawia kaihhruaiin neih chhunzawm a ni a, he hunah hian Central YMA Treasurer Fabian Lalfakawma chuan 'Ram leh Hnam humhalh' tih thupui hmangin thu a sawi a, Central YMA in khawmpui vawi 73 leh Rorel Inkhawm vawi 2 a lo neih tawh ah 'Ram leh Hnam humhalh' chu vawi 10 chuang Kumpuan-ah a lo neih tawh thu a sawi a, Mizoram chu sq.km 21,081 a zau a nih thu leh venhim tlat a ngaih thu te, Mizoram chu Mizote luah tur a nih thu leh hnamdang awm ve thiang mah se ram neitu an nih ve ngai loh tur thu leh Mizo Indigenous dik tak te tan chauh he ram thatna leh a Hnam hamthatna chu kan phal tur a nih thu te a sawi a. Tawng chungchang ah te, zirna lamah te, Ruihhlo do chungchang ah te, mihring kan pun theih nan Fa neih tam kawngah te, Zonun zemawi leh Thuam humhalh kawngah te, Thing leh Mau bakah nungcha leh tuihna humhalh kawng ah te, dikna leh rinawmna chungchang ah te, hnam-dang nupui/pasal neih loh chungchang ah te, tangka sum ngainatna chungchang ah te leh Sakhaw humhalh chungchang ah te hmalak a tulna te a sawi bawk a ni.

He hunah hian Sub-Hqrs. YMA Report hrang hrang ngaihthlak niin YMA Kumpuan bawh-zui tha lawmman chu Thenzawl Kanan Branch YMA hnenah hlan a ni a, Sub-Hqrs. YMA huam-chhunga Fa nei tam, Fa 7 nei chin mi 8 te hnenah chawimawina thuziak an hlan bawk a, kum kalta chhunga an member boral mi 238 te sunna hun hman a ni bawk.

Serchhip Sub-Hqrs. YMA hi June 18, 2008 khan hawn niin a huamchhungah hian Group YMA pathum (3)- Tuichangral South, Tawitlang leh Vantawng Group awmin Branch YMA 74 a awm mek a, kumin hian YMA Member 37,448 an awm mek bawk a ni.

Nimin a Serchhip Sub-Hqrs. YMA Rorel Inkhawm ah hian Serchhip khawpui chhung leh Group atangin Palai mi 300 dawn an tel a ni.

Comments

Popular News (Last 30 Days)