East Lungdar-ah Block Level Health Mela neiin damlo sang chuang inentir an awm

India ram zalenna kum 75-na lawmna, Azadi Ka Amrit Mahotsav kal zelah Ministry of Health & Family Welfare in ruahmanna a siam angin nimin khan E. Lungdar leh a chhehvel khuate tan East Lungdar-ah Block Level Health Mela buatsaih a ni a, damlo mi sang chuang an inentir a ni.

East Lungdar Thangburha Hall-a Block Level Health Mela neih hi District Bawrhsap Nazuk Kumar IAS chuan hawngin East Lungdar leh a chhehvel mipuite tana Health Mela buatsaih a ni chu lawmawm a tih thu a sawi a, Serchhip District chhunga Doctor thiam ber ber ten an khawtual ngeia a thlawna inentirna an buatsaih chu lo hmang tangkaia, a mamawh apiangten lo pan ngei turin mipuite a chah a. India ram pumah hetiang hriselna Ktpui hi kalpui mek a nih thu leh, inentirna mai nilovin hrisel tura mipuite nunkawng dik inzirtirna hun atana buatsaih a ni tih a sawi a ni. Bawrhsap chuan natna tam tak lakah hian awlsam taka inven theih a nih thu leh nunphung hrisel leh thianghlim lam kan uar deuh deuh a tul thu a sawi a, natna te hi hma taka hmuhchhuah chuan enkawl dam a awlsam zawk thin avangin rang taka damdawi In pan nachang hriat a pawimawh thu leh Health Insurance Scheme tha tak sawrkarin a kalpui mek te tih nachang kan hriat a pawimawh thu a sawi bawk a.Mizoram chu a thianghlim avangin mipuiten nunphung hrisel kan zawh phawt chuan vantlang hriselna lamah dinhmun duhawm takah kan ding thei a ni, a ti bawk.

District Surveillance Officer Dr. Lalngaihawmi Chhangte kaihhruai he hunah hian East Lungdar MO Dr. Lalrohlupuii chuan inlawmna thu sawiin, mihring in natna kan neih te rang taka a chhan hriatchhuah a nih theih nan leh Health & Family Welfare Department hnuaia Programme hrang hrangte inhrilhhriatna atan he hun hi buatsaih a nih thu a sawi a, East Lungdar VCP K. Lalngaizuala chuan lawmthu sawina a nei bawk a ni.

Nimin-a Block Level Health Mela-ah hian a mamawh apiangte pan theih turin Serchhip atangin damdawi In-a thawk te an kal a, Dawr hrang hrang 22 hawn niin inentir zawng zawngte hi an Health Record hrang hrang an dahthatna tur Health ID, ABHA ID chu siam sak nghal zel niin Healthcare hnuaia Health Insurance Card (Ayushman Bharat PM-JAY Card) siamsak an nih bakah Non-Communicable Diseases (NCD) Screening pawh tih sak nghal zel an ni bawk a. East Lungdar leh a chhehvel khaw hrang hrang atangin mi 1070 zet inentir an awm a, heng damlo te hi an mamawh ang Test neih sakin damdawi pawh a thlawna sem a ni bawk.