KVK North Vanlaiphai in Kisan Bhagidari Prath Mikta Hamari Campaign leh Farmers Fair an buatsaih

India sawrkar laipuiin India ram zalenna kum 75-na lawmna a kalpui mek, Azadi Ka Amrit Mahotsav denchhenin Serchhip District KVK, North Vanlaiphai te chuan nimin khan Kisan Bhagidari Prath Mikta Hamari Campaign neiin Kisan Mela/Farmers Fair chu North Vanlaiphai-a anmahni hmun ah an buatsaih bawk.

Kisan Bhagidari Prath Mikta Hamari Campaign hi Ministry of Agriculture & Farmers Welfare, Department of Agriculture & Farmers Welfare, Govt. of India kaltlangin India rampuma KVK te kaltlang a buatsaih niin Union Minister of Agriculture & Co-operation Narender Singh Tomar chuan biakhmuhtheihna kaltlangin a hawng a, hemi pual hian Serchhip District-a KVK North Vanlaiphai te chuan KVK North Vanlaiphai-a SMS (Agriculture Extension) Vanlalruali kaihhruaiin hun an lo hmang a, North Vanlaiphai SDO (Civil) H. Lalhruaitluanga chuan khuallian nia hmanpuiin loneitu thlanchhuah te an tel a, Agriculture leh a kaihhnawih Department atangin kuthnathawktute chawikanna Scheme an neih hrang hrang te ngaihthlak niin Technical Discussion hun hmann a ni bawk a, he hun ah hian Millet (Buhtun), Oil seeds (Thlai hriak nei) leh Bio Fortified Crops chungchang ah mithiam te nen a inkawmhona (Farmer’s Scientist Interaction) neih chhunzawm a ni bawk.

He program denchhen hian North Vanlaiphai KVK Ground-ah ATMA Serchhip District te nen tangkawpin Kisan Mela (Farmers Fair) neih chhunzawm a ni a, Line Department hrang hrang Block Agriculture Office, Block Horticulture Office, AH & Vety Department, District Agriculture Office leh KVK te bakah Self Help Group hrang hrang ten Dawr hawngin mipuite tana semchhuah theih hrang hrangte a thlawn a sem leh mantlawm zawk a hralhchhuah theih in an pholang a. A thlawna Ranvulh entirna hun (Animal Health Clinic) neih pahin Ui a hri danna pekchhuah a ni bawk. Heng bakah hian thlai chin chungchanga harsatna neite tan Agri Clinic buatsaih nghal niin Kuthnathawktu leh loneituten an thlai thar leh eitur chi hrang hrang zawrhchhuahna hun an nei nghal bawk a. He hun hi khaw hrang hrang atangin mi engemawzat in an chhim a ni.