Hri kai thar 102 leh enkawl dam 101 awm belh

Niminpiah khan Mizoram-ah COVID-19 hri kai mi 102 hmuh belh leh an ni a, heng te hi Sample enfiah 743 atang hmuh te niin Sample enfiah atanga za zela 13.72 te chuan hri an kai a ni.

Niminpiah-a hri kai hmuh te hi Rapid Antigen Test hmanga Sample enfiah 730 atanga hmuh te niin Saitual District-ah 45, Khawzawl District-ah 28, Serchhip District-ah 26, Kolasib District-ah 2 leh Champhai District-ah mi pakhat te an ni. Heng bakah hian niminpiah khan RT-PCR Laboratory hmangin ZMC-ah Sample 9 leh Lunglei-ah pakhat bakah Lunglei-a TrueNat Laboratory-ah Sample 3 enfiah niin hri kai hmuhchhuah an awm lo thung.

Nimin khan Mizoram-ah COVID-19 hri kai mi 101 te chu enkawl dam an ni ve leh bawk a, heti hian nimin tlai thleng khan Mizoram-a hri kai hmuhchhuah tawh chu 2,26,988 niin an zinga 2,25,697 te chu enkawl dam an ni tawh a, hri kai hmuhchhuah atanga chhutin za zela 99.43 te enkawl dam an ni tawh a, hri kai enkawllai 595 la awmin hri kai zingah mi 696 an boral tawh bawk a ni.

Nimin tlai dar 5:00 thleng khan District 11 zingah Siaha tihloh District dang zawngah hri kai enkawllai an la awm a, Saitual District chu hri kai enkawllai tamna ber niin mi 168 enkawl mek an ni a, District 4-ah hri kai enkawllai mi 10 an tling tawh lo bawk a ni.