Thudik hriat tum thin turin zirlaite chah

Sports & Youth Services changtu Minister Robert Romawia Royte chuan Lehkhabu te, chanchinbu te leh TV atangte a thu dik hriat tum turin zirlaite chu a chah.

Govt. Mizo High School Aizawl ten Annual Sports kharna hun nimin-a Aizawl Vanapa Hall-a an buatsaih a hmanpuina ah he thu h sawiin Sports & Youth Services Minister chuan Social Media a lar hnuin a chhe zawng leh hrisel lo zawnga thil sawi an tam nia a hriat thu sawiin, hei hian Mizo Society ang, Society thang mekah nghawng tha lo a nei theih thu leh kan sim vat a tul hle tih a sawi a. Zirlai naupangte hnenah an thu leh hla an hriatna te chu finfiah a pawimawh a tul thu sawiin, “Thu hriatna source a dik loh chuan ngaihdan diklo a put tir thei che u a, chuvangin lehkhabu te, chanchinbu te leh TV atang te in thu dik hi hriat tumin hengte hi chhiarin en tam thin ang che u,” tiin chah a ni.

Sports Minister chuan zirlai naupangte chu nu leh pa te neihsa atanga hlawhtlin aiin mahni tumruhna leh thawhrimna atanga hlawhtlinna neih hi a ropui leh a hlu zawk tih pawh hrilhin, tunlaiah hmanlai aiin zir tur leh hnathawh tur hrang hrang a tam tawh a, mahse hengah te hian a nachang hriat a ngaia, a nachang hria te tan chance a tam, tiin zirlai naupangte chu tumna sang nei turin a fuih a ni. New Education Policy 2020 hnuaiah Sports leh Physical Activities chu Co-curricular Activity ni tawh lovin Curricular Activity-ah dah a nih thu sawiin, hei hian zirna a ti nuam dawn nia a rin thu a sawi lang bawk a ni.