Lenkawl

Serchhip-a Horticulture Department chuan tunkar Zirtawpni, February 16, 2024 khian Serchhip Bazar-ah ‘Thlai thar Kut-cum-Exhibition’ an buatsaih dawn a, he hunah hian Serchhip District chhunga thlai leh thei bakah Pangpar tharchhuah te man tlawm zawka zawrhchhuah a ni ang.

Lok Sabha Inthlanpui neih tur atana inbuat-saihna kal mekah nimin atang khan Serchhip District-ah inthlan huna hman tur Electronic Voting Machine (EVM) First Level Checking (FLC) chu neih tan a ni a, EVM First Level Checking hi tunkar Zirtawpni thleng neih tura ruahman niin Ballot Unit (BU), Control Unit (CU) leh Voter Verifiable Paper Audit Trail (VVPAT) te chu uluk taka endik vek a ni anga, Polling Station a hman tur leh Reserve a dah tur te thliarhran an ni ang. EVM khawl-Control Unit, Ballot Unit leh VVPAT-te hi Electronics Corporation of India Limited (ECIL) Company siam niin, Company lam atanga lo kal Engineer rualte'n a endik hna hi an thawk a, Election Official te bakah Political Party aiawhte an tel bawk a ni.

Mizoram-a Jail thenkhat a tawt avanga mi tang mek te sawnkual kalpui mekah nimin khan Champhai District Jail-a tang mi 11 te chu Serchhip District Jail-ah rawn dah an ni.

Mizoram Assembly Inthlanpui hnuhnung ber a Palak bial atanga thlantlin leh Mara Autonomous District Council (MADC)-a Executive Member nilai K Hrahmo chuan nimin khan MADC Executive Member a nihna atanga a banna chu MADC CEM M.Laikaw-a hnenah a thehlut a. MDC a nihna anga December 2023 leh January 2024-a a hlawh, a Account-a lut chu MLA hlawha Account-ah a luh bawk avangin MADC-a thla khat leh a chanve hlawh chu a pelt nghal bawk a ni.

 MNF Party General Hqrs. Elected Office Bearers thlanna chu thla thar March 15 khian neih a ni dawn a, he inthlanna neih tur atan hian Vawiin hian Notification tihchhuah a ni dawn a, inthlanna chuh tumte tan February 28-28, 2024 chhungin Nomination thehluh theih a ni anga, heng te hi Feb 29-ah enfiah zui nghal tur niin March 2, 2024 thlengin inhnuhdawh theih a ni ang. Tarlan tawh angin MNF President leh Sr. Vice President bakah Vice President pakhat chuan midang ken an duh thu an lo sawi tawh a ni.

Nimin khan Champhai-ah District Child Protection Unit hnuaia Sponsorship and Foster Care Approval Committee chu Champhai DC hova thukhawmin kum 2022 leh 2023 chhunga naupang Sponsorship leh Foster Fund dawng turin naupang 130 dilna chu an pawmpui a. District Child Protection Unit chuan Sponsorship Programme hi kum 2015 atanga kalpui tawhin naupang 398 ten sponsorship hi an lo dawng tawh a, Sponsorship hi naupang kum 18 hnuailam tan dil theih a ni.

Bank of Baroda thuneitute chuan nimin tlai khan Chief Minsiter Lalduhoma chu a Pisa-ah hmuin an Bank Fund atangin Pulsar Bike pathum an hlan a, pakhat hi Chief Minister's Office a hman tur niin a dang pahnih hi 1st Bn. MAP leh 3rd Bn. MAP te hman tur a ni. He hunah hian Bank of Baroda atangin Brig. SP. Rawat, Defence Banking Adviser hovin SK. Tiwari, General Manager & Zonal Head, Debashis Baksi, Network Dy. General Manager leh thawktu dangtean tel a, Chief Minister chuan lawmthu lo hrilhin, Police Department lam pawh an lawm hle-a a rin thu a sawi a. Bank of Baroda ten Credit Deposit Ratio 63 lai an tlin avangin lawmthu a lo hrilh bawk.

Aizawl West-I bialtu MLA leh Adviser to Chief Minister TBC. Lalvenchhunga chuan a bial chhung atanga Mizoram Combined Competitive Exam 2023-a tlingte kawmna leh lawmpuina hun chu nimin khan a Pisa-ah a hmanpui a. He hunah hian Bialtu MLA chuan Mizoram sawrkar buatsaih Exam inelna sang berah a bial chhung atangin mi panga lai an tling thei chu lawmawm a tih thu sawiin, thalai dang ten hlawhtlinna an hmuh ve theih nan an theih ang anga Career Guidance pe thin turin a ngen a. Zirna chu a thil ngaih pawimawh ber a nih thu sawiin, ram hmasawnna bulthut a nih thu a sawi bawk a. Sawrkar hnathawk te chu Public Servant - mipui rawngbawltu an nih angin Officer tura tling tharte chu mipuite tan dawr nuam tak ni ngei turin a fuih bawk.

Hnahthial District chhunga Bank hrang hrangte hnathawh dan thlirhona chu nimin khan District Bawrhsap Chuauhnuna hovin neih a ni.

Environment, Forest & Climate Change (EF&CC) Department-a hnathawktute chuan Sava leh Thehlei kaptu a puh mi pathum leh an hmanrua te an man.