Sava leh Thehlei tam tak kaphlumtu a puh te man

Environment, Forest & Climate Change (EF&CC) Department-a hnathawktute chuan Sava leh Thehlei kaptu a puh mi pathum leh an hmanrua te an man.

Hemi chungchanga EF&CC Department hotute sawi danin Nungcha humhalhna dan, Wildlife Protection Act, 1972 bawhchhiaa Sava leh Thehlei kaptu-a puh an man tak te hi Lalchhuanawma (33) leh Lalthazuala (41), Tlungvel Venghlun a cheng ve ve bakah HS. Tlangkhuma (68), Tlungvel Vengthar-a cheng nia insawi te an ni a. EF&CC-in an tarlan danin Sava leh Thehlei an kahhlum te hi Tukkhumvilik 108, Vahui 10, Tuklo 10, Kawlrit 10, Vate 2, Kulherh 1, Liandorit 1, Hleikapsen 3, Hleilubial 2 leh Hleimeipar 2 te a ni. 

Kar kalta Inrinni khan EF&CC hnuaia Seling Forest Range leh Tawi Wildlife Sanctuary thawktute chu a huho in an vakchhuak a, heng mi te hi Tlungvel khaw daiah an Sava leh Thehlei kahhlumte bakah an kahhlumna hmanruate man sak nghalin Thawhtanni khan Aizawl Wildlife Division Pisa-a in report tura hriattir an ni a. Hemi ni hian Magistrate hmaah hruai nghal niin Central Jail-ah dahluh an ni a. Hmanrua an man sak te hi Air Rifle 2 leh a mu box 1, SBBL 1 leh a mu 15 leh Hand Pump (air pump) 1 te a ni.

EF&CC Department chuan an mi man te hian Sava leh Thehlei hi Phulmawi ram, Zawngsih hmuna kap an nih thu sawi mah se Tawi Wildlife Sanctuary hnaih lam a nih avangin Sanctuary chhunga mi a nih leh nih loh an chhui chang mek a Ramsa leh Sava veh ching an la awm fo chu an ngaimawh thu pawh sawiin, Dan bawhchhe lo tura mitin an ngen thu an sawi a ni.