Tunkar Zirtawpni khian Serchhip-ah ‘Thlai thar Kut-cum-Exhibition’ neih a ni dawn

Serchhip-a Horticulture Department chuan tunkar Zirtawpni, February 16, 2024 khian Serchhip Bazar-ah ‘Thlai thar Kut-cum-Exhibition’ an buatsaih dawn a, he hunah hian Serchhip District chhunga thlai leh thei bakah Pangpar tharchhuah te man tlawm zawka zawrhchhuah a ni ang.
‘Thlai thar Kut-cum-Exhibition’ neih tur chungchang ah hian nimin khan Serchhip-a District Horticulture Officer R. Lalrintluanga chuan Serchhip-a thuthar thehdarhtute a Pisa-a leng ah sawmin ruahmanna an siam te a hrilhfiah a. Serchhip DHO chuan a tirah chuan ‘Exhibition’ chauh nei tura ruahmanna an siam laiin mipui ten thlai tharchhuah hrang hrangte man tlawm zawka an lei theihna turin ‘Thlai thar Kut’ hi an ruahman belh leh tih a sawi a. He hun hi Serchhip Bazar Building chung berah hman tura ruahman a nih thu leh Exhibition-a phochhuah tur thlai chi hrang hrangte chu February 15, 2024 tlai dar 5:00 hmaa dahluh vek tur niin hei hi Thenzawl-a Horticulture College-a thawktu ten zan lamah an enfiah nghal anga, lawmman dawng turte pawh thlangchhuak nghalin a tuk, February 16, 2024-ah mipuite tan tlawh theiha hawn tur a ni anga, hemi ni chawhnu lam atangin mipuite tan hian lei theih a ni ang.

Serchhip DHO chuan tun tuma Exhibition-ah hian Serchhip District chhunga thlai leh thei tharchhuah chi hrang hrang 30 vel phochhuah a ni dawn tih sawiin, heng bakah hian kuthnathawktute thei tharchhuah leh thei anga siamchhuah eitur thenkhat te pawh phochhuah a ni dawn tih a sawi a. Serchhip-a Pangpar khawi lama hmalatute pawhin Pangpar chi hrang hrang an phochhuah dawn thu a sawi a. An thlai thar zawrhchhuah turte hi kuthnathawktu ten an tharchhuahna hmuna an hralhna, an kharchhawn tirna rate-a zawrhchhuah a ni dawn tih sawiin, hei vang hian mipuite pawhin he hun hi hmang tangkaiin rawn tlawh ngei se an duh thu a sawi bawk a ni.

Tun tuma Exhibition-ah hian Serchhip Mat Phai-a thlai tharchhuah hrang hrang bakah East Lungdar lam atangin Serthlum te, North Vanlaiphai atangin Sunhlu atanga eitur siamchhuah chi hrang hrang te, Khumtung atangin Balhla atanga Chips siamchhuah leh Baktawng atangin Aloe Vera atanga Sahbawn siamchhuah te pawh zawrhchhuah theih an beisei tih a sawi a. Exhibition Item hrang hrangah hian lawmman pakhatna atanga pathumna thleng bakah a tha zual thlanchhuah mi pahnih tan lawmman an siam dawn thu a sawi a. Kuthnathawktute chu tel theuh tura an sawm bakah mipuite pawhin tlawh ngei se an duh thu a sawi bawk a ni.