Lenkawl

Mizoram EIACP Hub – Mizoram Pollution Control Board-in kumin 2023 World Ozone Day puala a buatsaih ‘Quiz Competition for Mizoram College Eco-clubs’ ah Govt. Serchhip College chu pathumna an ni.

Serchhip District Volleyball Association (SD-VA) buatsaih Season Opening Tournament chu Inrinni khan khelh zawh niin Mipa-ah Keitum Kawn Veng VC leh Hmeichia ah Darnaam VC te an Champion.

National Highway-54 laihzauh leh siamthat mekin Serchhip Town chhung a helna tur, Ser-chhip Kikawn leh Sailiamkawn inkar leh Chhiah-tlang Kawn Veng leh Chhiahtlang Hmar Veng inkar te chu Zirtawpni khan Thenzawl DFO Lalbiakchama Chawngthu hovin Forest Department a thawktute leh Serchhip Sub-Hqrs. YMA hruaitute bakah NHIDCL leh Contractor te chuan a hmunah an tlawh a. He hna thawh meka Stage-I (In Principle Approval) a hnathawktute zawm tur hrang hrangte an zawm tha em tih leh helai kawngpui laih avanga complaint lut thenkhat te enfiah niin NHIDCL leh Contractor dangte hnenah an tihdik loh laite tun Thal chhung ngeia siamtha/siamdik tura hriattir an ni.

Serchhip khawpui chhunga United Pentecostal Church (UPC) NE India hnuaia Thalai pawl Pentecostal Youth Department (PYD) te chuan nimin Pathianni hmang khan a vawi khatna atan UPC Serchhip Dinthar Biak In-ah ‘Serchhip Town Area Joint Meet’ an hmang a, Speaker atan General PYD North East India UPC-a President Rev. C. Lalthantluanga chu hman niin nizan thleng khan hun hman a ni. Serchhip Town chhungah hian UPC (NEI) hian Pastor Bial pathum neiin heng te hian Serchhip pawnlam thleng an huam a, Town chhungah Kohhran 11 an nei mek a ni.

Kar kalta Thawhlehni zan-a Tuikual lui lian thut in a lak Lalhmingmawia, Aizawl Dinthar Veng ruang chu Inrinni khan hmuh niin Inrinni zan vek khan vuiliam a ni. Thudawn danin Inrinni chawhnu dar 1:30 vel khan Sairang Dinthar-a Buichali lei thlang deuh vaukam-ah tu tih hriat loh ruang hi hmuh a ni a, Aizawl Dinthar khaw-tlang hruaitute hriattirin enfiah a nih hnuah a ban a Tatoo atangin Thawhlehni zan-a Tuikual lui in a lak Lalhmingmawia ruang a ni tih finfiah a ni a, a ruang hi Sairang Dinthar YMA Hall-ah lak niin Inrinni zan vek khan vuiliam nghal a ni.

Champhai District chhunga Grape chingtute chuan kumin hian Grape rah Rs. 1,23,54,000/- man an hralh tawh.

Tripura-a inbenbel thlang, Bru voters 3,500 vel te Mizoram Electoral Roll-a thun tura ngenna chungchangah Election Commission of India (ECI) atangin chhanna engmah a la awm lo nia thudawn a ni a. Tarlan tawh angin Mizoram Bru Displaced People Forum hmingin Bruno Msha chuan September 6 khan ECI-ah ngenna thlenin tun thlenga Resettlement Location la tifel lo, Bru chhungkua 651-a voter 3,500 bawr velte chu chhan hrang hrang avangin Tripura Electoral Roll-ah thun an la ni lo tih a sawi a, kumin inthlanpuiah vote an thlak theih ngeina tura hmala turin ECI-ah ngenna a thlen tih a ni. Hetihlai hian ECI atangin hemi chungchang ah hian chhanna dawn an la nei lo tih Bruno Msha chuan sawi bawkin, beiseina erawh an neih thu te, vote thlak thei ni si a, khawi Electoral Roll mah a chuan loh chu dan kalh a nih thu leh Tripura sawrkarin a pawm theihna turin, kumin inthlan thleng tal Mizoram Electoral Roll a chuang tura ngenna an thlen thu te a sawi a ni.

Rajya Sabha MP K. Vanlalvena chuan Zirtawpni khan Ward Corporator leh AMC hmalaknaa siam Republic Veng Lungli Tui Water Treatment Plant a hawng. Lungli Tuikhur tuihna humhalh hi March 4, 1996 atang khan tan a ni tawh a, Tui tlantu ten mumal taka tui thianghlim leh hrisel mahni chenna In theuha an lakluh a, an tlan theih nan hmalak nghal niin 'Lungli Tui Tlan Society' din a ni a. Society member hi chhungkaw 232 vel an ni mek a, a hnathawhna huam chin (Area of operation) hi Republic Venghlun, Upper Republic leh Mission Veng te a ni. Society hian inkaihhruaina dan mumal tak a nei a, tui haw dan tur bithliah mumal tak viltu ruaia ruahman a ni a. Member-te atanga kumtin member fee  Rs. 250/- khawn atangin tul ang te hmalak thin niin helai hmuna tui lak te tih thianghlimna tura hmalakna, Lungli Water Treatment Plant siam nan hian Rs. 14,00,000/- sen a ni.

Mizoram-a rawn zin Ministry of Development of North Eastern Region (DoNER) a Minister of State BL. Verma chuan Inrinni tlai khan Mizoram Governor leh Chief Minister te chu an chenna ah a kawm.

Ministry of Development of North Eastern Region (DoNER) a Minister of State BL. Verma chuan Inrinni khan North East Special Infrastructure Development Scheme (NESIDS) hmanga Lengpui Airport tihchangtlunna hna ‘Improvement/Upgradation of Operational/Non-Operational facilities of Lengpui Aiport’ thawh mek chu a hmunah a enfiah.