Lengpui Airport tihchangtlunna hna thawh mek enfiah

Ministry of Development of North Eastern Region (DoNER) a Minister of State BL. Verma chuan Inrinni khan North East Special Infrastructure Development Scheme (NESIDS) hmanga Lengpui Airport tihchangtlunna hna ‘Improvement/Upgradation of Operational/Non-Operational facilities of Lengpui Aiport’ thawh mek chu a hmunah a enfiah.

Union Minister BL. Verma hian Inrinni khan Lengpui rawn thlengin Lengpui Airport tihchangtlunna hna hrang hrang – Elevated Road, Departure Lounge, Baggage Make Up Area leh adangte chu fangin a tlawh a. GAD Secretary K. Lalthawmmawia; Planning & Programme Implementation Secretary Lalmalsawma Pachuau; Principal Consultant, Aviation, Wing Cdr. (Rtd) J. Lalhmingliana; PWD, GAD leh Planning Department Senior Official te pawh an tel a ni.

Lengpui Airport VIP Lounge-a Meeting tawi neihah, Minister leh amah zuitu Ministry of DoNER-a Joint Secretary leh Director ten PWD leh GAD (Aviation Wing) hotute te chu he hna thawh mek chungchang thil pawimawh hrang hrang te zawtin zawhfel a nih vat thei nan ruahmanna te an sawipui a. He hna hi December ni 4, 2023-a zawhfel turin a hun pawhsei nihmahse Union Minister in April ni 11, 2023 a helai hmun a tlawh tum khan October 2023 chhunga zofel thei tura hma lo la turin a lo hrilh tawh a, chumi ang chuan he Meeting-ah pawh hian Minister chuan ngawrh taka theihtawp chhuaha October 2023 ralhma ngei a he hna hi zawh ngei nise tiin a duh thu a sawi nawn leh bawk.

Improvement/Upgradation of Operational/Non-Operational facilities of Lengpui Aiport hi NESIDS sum cheng nuai 1959 hmangin thawh mek a ni a, tun dinhmunah hna – Civil Works hi za zelah 88 leh Electrical Works hi za zelah 68.31 thawh zawh a ni tawh a ni.