Lenkawl

Serchhip District Task Force on Immunization leh District Level Anaemia Mukt Bharat Steering Committee chu nimin khan an Chairman leh District Bawrhsap David Lalthantluanga hova thukhawmin hri danna pek dan tur leh hemi kaihhnawiha thil pawimawh dangte an sawiho.

Serchhip Teachers' Association (STA) kum 50 tlin lawmna chi khat atana buatsaih ‘1st MLA Trophy Inter-School Challenge 2023’ lawmman semna chu nimin khan neih niin Serchhip bialtu MLA Lalduhoma chuan khuallian niin a hmanpui a ni.

Serchhip Dinthar Veng-a cheng Rosangzuali (28) nikum May thlaa a thihna thubuai ah mawh-phurtu a puh a pasal PC. Zobiaksanga chu thiamloh chantir a nih hnuah damchhung tang tura a chungthu rel a ni.

Mizoram-a vantlang mipuite tana thawktu hriat lar Vanramchhuangi, Ruatfela nu tia hriat bawk chuan hmasawnna hnathawh chu mipuite tawrhna thlen kher lova kalpui theih a nih thu a sawi.

MNF Serchhip East Block chuan Mizoram sawrkar in Serchhip District Hospital-a Hmeichhe lam thiam Doctor (Obstetrician & Gynecologists) a rawn dah thar ta chu lawmawm an tih thu nimin khan thuchhuah siamin an tarlang.

Nimin khan Lawngtlai-ah District Level Task Force on Ruihhlo Do chu Social Welfare & Tribal Affairs Minisster Er. Lalrinawma hova thu-khawmin Lawngtlai District chhunga ruihhlo do kawnga hmalakna hrang hrang leh hmachhawp te thlirin an thukhawm.

Ramchhung mipui hmun hrang hranga chengte, sakhaw hrang hrang vuantu leh tawng hrang hrang hmangtute inkarah inpumkhatna leh inremna chawilar a nih theih nana kum tin-a hman thin Sadbhavana Diwas chu Vawiin hian Sawrkar Pisa tinah hman a ni dawn.

Mizoram School of Photography leh Photography Club of Mizoram ten World Photography Day vawi 184-na puala Millennium Centre Atrium-a Photo Art Exhibition an buatsaih chu nimin khan Rajya Sabha MP K. Vanlalvena chuan a hawng a, Exhibition a pholan tur hian thlalak 332 lut zinga 70 thlanchhuah a niin tunkar Inrinni thleng neih a ni ang.

Election Commission of India (ECI) chuan nimin khan rampuma State leh UT tina CEO hnuaia Media Cell te Video Conferencing hmangin Meeting an neihpui a, ECI chuan Media leh Social Media hrang hrangah thudik lo emaw, belhchian dawllo (fake news) emaw thehdarh a ni thin te, mipuite leh a bik takin voter-te ti chiai zawnga thu thehdarh a ni thin te leh Media hmanga political party ten an inpuanzar (advertise) dan te fimkhur leh uluk zawka vil hna thawk turin Media Cell te an chah a ni. Kumin-a Mizoram Assembly inthlanpui neih tur atan Mizoram CEO hnuaiah Media Cell din a ni tawh a ni.

Deputy Chief Minister Tawnluia chuan nimin khan Sustainable Development Goals pakuana, ‘Fostering Industry, Innovation, Infrastructure and Livelihood Oppurtunities at Sialhawk, Lungleng and Seling’ hnuaia hmalakna pakhat ‘Pineapple Processing Plant’ lungphum phumna hun Sial-hawk-ah a hmanpui a. Sialhawk khuaa Pineapple Processing Plant bultan theih a ni ta chu lawmawm a tih thu sawiin, Pineapple Processing Plant chu Sialhawk mipuite taimakna leh tha-hnemngaihna in hrinchhuah a nih thu a sawi bawk. Pineapple Processing Plant atan hian cheng nuai 199 ruahman niin Sialhawk Pineapple Growers Society tarlan danin Sialhawk khua hian nikum Fur chhung khan Lakhuihthei quintal 14,000 an tharchhuak a, Thal laiin Fur laia an thar hmun nga a thena hmun khat an tharchhuak bawk.