Serchhip-ah Task Force on Immunization leh Anaemia Mukt Bharat Steering Committee thukhawm

Serchhip District Task Force on Immunization leh District Level Anaemia Mukt Bharat Steering Committee chu nimin khan an Chairman leh District Bawrhsap David Lalthantluanga hova thukhawmin hri danna pek dan tur leh hemi kaihhnawiha thil pawimawh dangte an sawiho.

India sawrkar chuan natna hri leng inkaichhawn theih laka him nan naupang zawng zawngin a hun taka hri danna (vaccine) an lak a ngai pawimawh hle a. Tunhnaiah Measles leh Rubella natna te India ram atanga umbo a tum avangin ngawrh lehzuala hmalak mek a ni a. Ram pumah vaccine hiRround thum-ah thenin a la thei tur chin nu naupai atanga naupang zawng zawng ten hmaih hauh lova a hunbi a vaccine an lak theih nan ruahmanna siam a ni. Serchhip District chhungah hian Round khatna neih zawh tawh niin, August ni 7 atanga ni 12 chhung khan neih a ni. Round hnihna hi September ni 11 atanga ni 16 chhungin neih leh tura ruahman niin Round thumna pawhOctober ni 9 atanga 14 ah neih a ni ang.

Measles leh Rubella natna umbo tum a nih avang hian Immunization Special drive kalpui a ni a. Kum dangah chuan naupang kum 2 hnuailam target an nih laiin kumin atang chuan naupang kum 5 chin hnuailam zawng target an ni ta thung a. Nu naupai te hnenah hian TD (Tetanus-Diphtheria) vaccine pek an ni bawk. Naupang leh nu naupai, a la tur chin zawng zawngin vaccine an la kim em tih endik turin Survey neih thin a ni a, Health Worker te leh ASHA te bakah Anganwadi a thawktute pawhin he Survey-ah hian an pui thin a. Vaccine lak hmabak engzat nge awm tih leh an lakloh chhan te zirchiangin vaccine an dawn ngei theih nan remchang an siamsak thin a ni.

Serchhip DC Meeting Hall-a nimin-a thutkhawm neih ah hian Deputy CMO Dr Lallawmkimi Chhakchhuak chuan First Round neih zawh taka an thil tawn te sawiin, Sakhaw thil avanga vaccine la duh lo awm thin te zingah pawh vawi tam tak an kalchilh hnua la duh an awm tih a tarlang a. Kumin atanga Online Reporting an kalpui tan thu leh vaccine an pek apiangin report hi hmun leh hmunah Internet kaltlanga an ziahluh nghal zel thu a tarlang bawk.

Hemi hnu hian Anaemia Mutk Bharat Steering Committee thutkhawm neih zui niin he hmalakna hi National Anaemia Control Programme hnuaiah kalpuiin thisen tlakchhamna (Anemia) laka Mizoram mipuite kan fihlimna tura beihpui thlak mek a ni. Sawrkar laipui chuan September 2018 khan a lo kalpui tan tawh a, Mizoram-ah chuan hemi atana damdawi sem tur Iron-Folic Acid chu kan mamawh zat kan hmuh lawk theih loh avangin March 30, 2021 khan kalpui tan a ni. Nausen thla ruk atanga thla 59 te chu hlawm khata thenin hlawm dangah kum 5 atanga kum 9, kum 10-19, Hmeichhia kum 20- 24, Nu naupai leh nu nausen pawmte hnenah Iron-Folic Acid hi sem thin a ni. Nimin-a thutkhawm ah hian he damdawi semchhuahna kawnga hma an lak dan leh harsatna an tawh te ngaihthlak a ni bawk.