1st MLA Trophy Inter-School Challenge 2023 lawmman semna Serchhip-ah neih a ni

Serchhip Teachers' Association (STA) kum 50 tlin lawmna chi khat atana buatsaih ‘1st MLA Trophy Inter-School Challenge 2023’ lawmman semna chu nimin khan neih niin Serchhip bialtu MLA Lalduhoma chuan khuallian niin a hmanpui a ni.

Serchhip Sub-Hqrs. YMA Conference Hall-a he hun hmanna ah hian Serchhip bialtu MLA Lalduhoma chuan Zirlaiten an zirna lamah hmasawnna an neih theihna tura Serchhip Teachers' Association (STA) in thil tha tak an ngaihtuah chhuak tih sawiin, hmun danga la tih ngailoh leh a vawikhatna nia a hriat thu a sawi a. Mizoram chu India ram State dangte ngaihtuahin hmasawnna kawngah bul kan tan tlai a, kawng engkimah kan hnufum tih sawiin, Zirna kawngah ziak leh chhiar thiam tamna ni mah ila Performance Index atanga chhut chuan kan la hniam hle tih a sawi a. Zirna In chhe tak tak awmin, NABARD atanga a siamna tur pawisa lo kal te chu a hmanna tur dik takah hman anih loh thu leh a nihna takah hman anih chuan zirna In te chu tha tak taka thawm theih a nih thu a sawi a. Zzirtirtu indaihlohna a nasa in, hnaruak hnawhkhah theih anih loh thute, Zirtirtu an indaihloh chuan zirna kawngah hmasawnna a awm theih loh thu te sawiin, a MLA Fund hmanga Zirtirtu a rawih thu a sawi a, “Kan dinhmun ngaihtuah in kan thlen chin erawh a sang a ni,” a ti bawk. Hei bakah hian bialtu MLA chuan Mizo zirlaite chu tawng thiam lamah nasa zawka hma an sawn a ngaih thu sawiin, nungchang tha leh awmdan mawi kan zir thar a ngaih thu a sawi bawk.

STA hian kum 50 an tlin lawmna chi khat atan kumin July ni 7 khan Govt. High School Serchhip-ah ‘26th Serchhip Assembly Constituency - First MLA Trophy Inter-School Challenge 2023’ hi an lo buatsaih tawh a. He hunah hian Serchhip khawchhunga Primary School, Middle School leh High School-a zirlai naupang thlanbik 5 theuh ten Subject hrang hrangah Exam a inelna an nei a. Primary Section-ah Primary School 9 atangin zirlai naupang 45 ten English, Mizo, Enviromental Science leh Mathematics Subject te exam in Bianca C. Vanlalawmpuii (LFCS) chu pakhatna niin Franky Lalpekhlua (LFCS) chu pahnihna leh HT. Lalhruaitluanga (PES Serchhip) chu pathumna an ni a. Middle Section-ah School 10 atangin zirlai 41 ten Mizo, Science, GK leh Mathematics Subject-ah inelna neiin PC. Lalruatkimi (LFCS) chu pakhatna niin Roland Vanneihtluanga (LFCS) chu pahnihna leh Florence Malsawmpuii leh C. Lalvenpuii (LFCS) te pathumna an ni bawk.

High School Section-ah School 7 atangin zirlai naupang 35 ten English, Mizo, Social Science leh Mathematics Subject-ah inelna neiin Ramthansiami (Marian H/S) chu pakhatna niin Lalrinfeli (Govt. JM H/S) chu pahnihna leh Lalrin-nungi Ralte (Marian H/S) chu pathumna an ni a. Higher Secondary Section-ah HSS tina Cl-XII zirlai 5 theuh ten Class-X Level All Subject Syllabus-ah inelna neiin Vanlalremtluangi chu pakhatna niin Lalruatmawia chu pahnihna leh Ruthy Lalrinmawi Hauzel te chu pathumna an ni a, an vai hian Govt. Higher Secondary School Serchhip-a zirlai an ni. College leh DIET zirlai ten MPSC Competitive Exam Question behchhana zawhna siamah inelin Lalbiakmawia chu pakhatna niin Lalrem-kima chu pahnihna leh Zairemmawia chu pathumna an ni bawk a, an vai hian DIET Ser-chhip-a training lai an ni.

Inelna hrang hranga pakhatna te hian lawmman ah Rs. 3000/- dawngin pahnihna hian Rs. 2000/- leh pathumna te hian Rs. 1000/- an dawng a, Trophy leh Certificate  hlan tel theuh an ni bawk.

Nimin-a he lawmman semna hun hi STA President Vanlalchanchinthahrimawia chuan kaihruaiin STA Secretary John Lalvenzela chuan Report a pe bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man