Environment tihchhiat do zel an tum thu an sawi

Mizoram-a vantlang mipuite tana thawktu hriat lar Vanramchhuangi, Ruatfela nu tia hriat bawk chuan hmasawnna hnathawh chu mipuite tawrhna thlen kher lova kalpui theih a nih thu a sawi.
Nimin a Serchhip Press Club-a Zawlpui FMC hruaitute nen thuthar thehdarhtute a kawmna ah Vanram-chhuangi chuan nikum June thla khan NH-54 kawngpui laih in Mat phai Zawlpui leilet a tihchhiat tur an en tawh thu sawiin, “Tun anga a chhiat tur hi ka hmu a, ka rin lawk ang ngeiin a chhe ta a ni,” a ti a. Mat phai Zawlpui hi Mizoram thlai a chawmtu a nih avangin a pawimawh thu sawiin, “Hmasawnna hnathawh a awm chuan kan tuar tur alawm tih hi a dik lo, kan tuar tur a ni lo. Tuar lo turin rua-hmanna siam sa vek a ni a. NHIDCL in chu chu an zawm loh avangin kuthnathawktute tawrhna nasa tak a thleng mek a ni,” a ti a. Awmze neia chet tir dawn chuan Law Court a kal mai chu kawng awmchhun a nih thu a sawi bawk.

Environment chu kan nunna niin kan vawnhim a ngai tih pawh Vanramchhuangi chuan sawiin, “Development hming chhala dan bawh-chhiaa hlawk tum ngar ngara an kal hi kan duh lo a, kan bei kal mek a ni. Dan zawh famkimin fimkhur takin ti rawh se, State dangah pawh kawngpui laihin environment a tichhe kher lo a, heti taka NHIDCL in hlauh nei lo a an thawk bik hi an phenah kan State mi thenkhat an awm niin a ngaih theih a, State Level a endiktu tur Monitoring Committee ten an hna an thawk tha lo hle a ni,” a ti bawk.

Zawh belhna chhangin Vanramchhuangi leh amah zuitute chuan, “Ram hi sawrkarin a mamawh chuan a la lui thei a. Mahse, a lak dawn chuan ram neitu in compensation a tel ngei a ngai a. Tuna kan awm danah chuan compensation dawng lo te tawrhna a thleng a, a tihchhiat dan ang zelin claim theih a ni,” an ti a. NHIDCL hnathawhin ram-ngaw bakah lui tui leh leilung a tihchhiat hi theih tawpin an do zel dawn tih an sawi bawk.

Comments

Popular News (Last 30 Days)

Vawiin-ah HSSLC Exam result