Rosangzuali thihna ah a pasal damchhung tang tura tih a ni
Nikum May 29-a Rosangzuali thihna thu ah hian Addl. District & Session Judge-I Ngur-sangzuali Sailo chuan mawhphurtu a puh a pasal PC. Zobiaksanga hi niminpiah-a thiamloh a chantir hnuah nimin khan hremna tur hi puangin damchhung a Jail-a tang turin a chungthu a rel sak a ni.
Tarlan tawh thin angin nikum (2022) May 29 (Pathianni) khan nupa-a kut inthlakna ni ngeia hriat ah Rosangzuali (28), Serchhip Dinthar Veng hi boralin he thihna thlengah hian a pasal PC. Zo-biaksanga chu a mawh phurtu ah ngaih a ni a, Police ten thu zawhfiah tura la nghalin Police te hnenah hian Zobiaksanga hian a nupui hi kut a thlak ngei thu a sawi a. Rosangzuali hian Inkhawm tura a kal hmain thawmhnaw thenkhat suk tur dahin hei hi Inkhawm ban ah a pasal hian a lo la suk loh avangin an inhnial a, hetah hian Zobiaksanga thin thawk thut chuan Choka-a thingzai bung chu lain mutna pindan-a a nupui awm chu tum hnih a vua a. Rosangzuali thichhawng a awmin Zobiaksanga mangang hian a bawihsawm zui nghal a, amah-erawh chu a chhan theih tak loh avangin an In chunga a nau chu Phone-a bia in he thil hi hriat a ni a, a pasal hi Police te chuan an man nghal a ni.
He thil thleng ah hian Serchhip Police te chuan a tirah tualthah thubuai ziaklutin Rosangzuali chhungte pawh hian FIR an thehlut a, Rosangzuali ruang hi hemi zan hian an khua, Lungleng-ah lak niin Aizawl Civil Hospital-a Postmortem a nih hnuah a tuk May 30, 2022 khan vuiliam a ni.
Comments
Post a Comment