Lenkawl

Sawrkar laipui Ministry of Women & Child Development-in India khua leh tui, naupang kum 18 leh a hnuailam te zinga midangte chhanchhuah hna lo thawk tawhtu emaw, midangte tana entawn tlak khawpa- Sports, Social Services, Science & Technology, Environtment, Arts & Culture leh thil thar chin chhuah (innovation) lama khawtlang mipuite tana entawntlak khawpa thil tha titute hnena National Award a pek thin, Pradhan Mantri Rashtriya Bal Puruskar (PMRBP) chu kumin atan rawtna leh dilna thehluh hun hawn leh mek a ni a. He lawmman dawng tlaka ngaihte rawt leh dilna thehlut duh tan awards.gov.in-ah dil tur niin August 31, 2023 thleng hun hawn a ni a. Hrechiang duh tan Serchhip DC Office-ah zawh-fiah theih a ni bawk ang.

Serchhip-a Transport Department hnuaiah kumin January atanga June thla tawp thleng khan lirthei ziahluh thar 314 a awm tawh.

Pradhan Mantri Aawas Yojana-Housing For All (PMAY-HFA) (Urban) hnuaia tunlai hian Mizoram khawpui (Cencus Town) hrang hrang 23-ah In sak tanpuina sem mek a ni a, kum 2024 ralhma ngeiin tanpuina dawng tura thlan te hi tanpuina an dawn tur ang zawng zawng pek kim vek hman tum a ni.

Serchhip SP Vanlalnghenga chu 1st IR Bn. ah Commandant hna chelh tura sawn a ni a, a aiawh tur hian Kolasib-a SP nilai MS. Dawngkima chu rawn dah thar a ni. Vanlalnghenga hian kumin April thla atang khan Serchhip SP hna hi a chelh a ni.

Serchhip District Chess Association (SDCA) buatsaih Serchhip District Open Chess Championship chu tun thla ni 21 leh 22 khian Serchhip Town Hall (Academic Hall)-ah khelh a ni dawn a, Serchhip District chhunga Chess khel thiam te chu tel tura sawm niin Entry Fee Rs. 100/- a ni anga, pakhatna atanga 10-na thleng tan lawmman siam a ni dawn a ni.

Mawmrang-a Organic FPC leh NHAR Organic Pvt. Ltd, Guwahati te chuan Contract Farming atan thawhhona thuthlung ziakin hemi hnuaiah hian Chhawhchhi tharchhuah hralh a ni anga, he hun hi Agriculture Minister C. Lalrinsanga kaihhruaina hnuaiah neih a ni.

State Steering Committee on PM eVIDYA DTH TV Channel, Mizoram chu nimin khan School Education Department changtu Secretary Dr. Lalzirmawia Chhangte hovin a Office-ah an thukhawm.

Lunglei leh Tlabung inkar, NH. 302 chu Fur ruahtui tla mekah lirthei tana zawh harsa khawpa a chhiat avangin mipui mamawh phurtu lirthei thenkhat chu an tlan ngam lo mek nia thudawn a ni a, he kawng sial leh laih that hna hi a tirah thla 18 chhunga zawhfel tura tih ni mah se hemi hun chhung hian zaa 15 pawh zawh hman a ni lo a, thla 12 atan hnathawh hun hi pawhsei sak leh niin hei pawh hi kumin October thla ah zo leh dawn a, hna erawh thawh a la awm mang lo nia thudawn a ni bawk.

Assam Rifles leh Mizoram Police tang-kawp chuan nimin July 17, 2023 chhun khan an thudawn bawhzuiin Chamdur P (Lawngtlai District)-ah ralthuam chi hrang hrang pathum an man a, heng ralthuam te hi lei laih khuara thuhruk niin Gelatin Sticks, Detonators leh Silai Mu te a ni. Heng ralthuam te hi Lawngtlai District Police-te'n kawlin dan anga chhui zui tur a ni dawn a, heng kaihhnawih ah hian mihring man erawh an awm rih lo thung a ni.

Kumin kumtawp lama Mizoram in Assembly inthlanpui a hmachhawn tur atana inbuatsaihna atan Electoral Roll enfiah hna chu thla thar August 1 atang khian thawh tan a ni dawn a, hming thun, paih, siamthat leh insawn duhte tan hun hawngin October 4-ah Final Electoral Roll tarchhuah tur a ni ang. Election Commission of India chuan Assembly leh Parliament inthlan dawn apiangin Electoral Roll enfiah hna hi a kalpui thin a ni.