Chhawhchhi hralh turin thawhhona tur ziakfel

Mawmrang-a Organic FPC leh NHAR Organic Pvt. Ltd, Guwahati te chuan Contract Farming atan thawhhona thuthlung ziakin hemi hnuaiah hian Chhawhchhi tharchhuah hralh a ni anga, he hun hi Agriculture Minister C. Lalrinsanga kaihhruaina hnuaiah neih a ni.

Nimin-a thawhhona thuthlung ziahna hunah hian Agriculture Minister chuan tunhnai maiah Haulawng lama Mizo Hmarchate tharchhuah te USA-ah hlawk takin hralh a nih tawh thu sawiin, hetiang hian Kuthnathawktute thawhrimna rah hlawk zawka sum a chantir turin sawrkarin hma a la chho mek zel tih a sawi a. Thlai rah dangah te pawh Contract Farming hi kalpui chhoh zel tumna a awm thu leh hma pawh lak mek zel a nih thu a sawi a ni. Agriculture Minister chuan a mimal anga thlai thar te hralh ai chuan Cooperative Movement hnuaiah hetiang anga kuthnathawktute thawhhona leh tanrualna hian awlsamna kawng tam takah a siam thu sawiin, a hlawk zawk bawk tih a sawi a ni.

Contract Farming a thawhhona thuthlung hi Agriculture Minister Office Chamber-ah ziah niin Mawmrang Organic FPC aiawhin Brenda Lalrinsiami, CEO leh NHAR Organic Pvt. Ltd. aiawhin Mirdul Sharma ten MOU-ah hian an hming an ziak a. Sanjay Kumar, Clover Organic Pvt. Ltd. leh Chinmoy, PMU, MOVCD( NER ) te hriatpuitu ah an tang bawk a ni. He inremna ang hian Mawmrang Organic FPC hnuaia kuthnathawktu chhungkaw 100 ten kumkhat chhunga Chhibung (White Sesame) an tharchhuah chu a tlem berah 60 Metric Ton emaw, a tam lamah 100 Metric Ton chu NHAR Organic Pvt Ltd te hian an leisak dawn a ni. Mawmrang Organic FPC hnuaiah hian Pawlrang, Khawkawn, Changzawl leh Lamzawl khuaa kuthnathawktute an thawkho a ni.