PM eVIDYA DTH TV Channel chungchang sawihona nei

State Steering Committee on PM eVIDYA DTH TV Channel, Mizoram chu nimin khan School Education Department changtu Secretary Dr. Lalzirmawia Chhangte hovin a Office-ah an thukhawm.

He thutkhawm ah hian SCERT Director Laldawngliani Chawngthu chuan he TV Channel chungchang hi sawifiahin, July 29, 2023-a NEP 2020 tlangzarh champha vawi 3-na denchhenin, India ram pumah a ruala hawn a nih tur thu a sawi a. Ministry of Education, Govt. of India hmalakna a zirna atan bik liau liau a TV Channel State tin te a pek chungchang te sawiin, PM eVIDYA DTH TV Channel chu Mizoram pawh channel panga (5) pek kan nih thu leh chuta Channel panga zinga pahnihte chu Phase hmasa ber atan tihchhuah tura hmalak niin heng channel pahnihte hi Elementary Level tan Zirna Kailawn-Learning Ladder (MZ128) leh Secondary Level tan Zirna Lamtluang-Learning Pathway (MZ129) te an nih thu a sawi. 

He huna tarlan a nih danin MZ128 leh MZ129 channel te hi DD Free Dish DTH (MPEG-4) Set top box hmangte in en theih a ni dawn a, Mizoram-ah pawh School-a TV nei zawng zawngin an en vek theihna turin hmalak a ni.