Lenkawl

Ramchhunga ‘Poshan Maah’ (Nutrition Month) hman mek pualin nimin khan Serchhip-ah ‘Mother's Kitchen Contest’ leh ‘Indegenious Toy Fair’ neih a ni.

Serchhip District-a Faina Beihpui Thlakna, Swachhata Hi Seva, 2022 hawnna chu nimin zing khan Serchhip-a District Bawrhsap Nazuk Kumar IAS hovin neih a ni a. He beihpuithlakna hi thla thar October 2 thleng kalpui tur niin thingtlang khaw hrang hrangah Faina kawnga hmalakna leh inzirtirna kalpui a ni dawn a ni.

Serchhip-a Zu rawn phurhluh tur nia hriat litre 290 zet chu nimin zing khan Chhiahtlang-ah man a ni.

Village Council Seat khat ruak a awm vanga by-election neihna Baktawng VC-ah chuan Seat 2 ve ve nei MNF leh INC te chuan VC Executive Body siamin an thawkdun ta.

Serchhip District Hospital Building thar sak tur atana ngaihdan inanglo awm chungchang chu nimin khan Serchhip-ah District Bawrhsap Nazuk Kumar IAS hovin sawiho a ni.

Kumin chhunga African Swine Fever (ASF) vanga Serchhip District-a Vawk thi chu 300 a tling ta. Pathianni kalta hnu lama Serchhip District-a ASF vanga Vawk thi chhinchhiah a awm loh hnuah nimin khan Khawlailung khua ah Vawk thi pakhat chhinchhiah belh leh niin heng te nen hian kumin March 29 hnu lama Serchhip District-a ASF vanga Vawk thi chu 300 a tling ta a, Khawlailung-ah hian nimin khan Vawk pakhat suat ni bawkin ASF vang hian Vawk 392 suat a ni tawh bawk a ni. Heng bakah hian hri lenna a puan ni lo ah Vawk thi 26 awm tawhin Vawk 134 suat a ni tawh bawk.

Serchhip District-ah nimin tlai thleng khan COVID-19 hri kai enkawllai mi 29 an awm leh tawh.

Govt. Mizoram Law College chuan nimin khan an College-ah zirlai lut thar te lawmna leh an zirlai hlawhtling te chawimawina hun an hmang a, he hun hi H&TE Minister Dr. R. Lalthangliana chuan a hmanpui a ni. He Law College hi kum 1983-ah din niin kum 2004-ah Mizoram Law College ti-a hming thlak a ni a, kum 2013-ah sawrkar in a la a ni. A din tirh atangin mi 665 ten LLB an pass chhuak tawh a, tunah hian zirlai 189 leh zirtirtu 13 vel an awm mek bawk a ni. Nimin-a he hun hmanna ah hian zirlai thar 71 te lawm niin Exam hnuhnung berah mi 44 in First Division ah pass in, mi 14 ten Second Division-ah an pass a ni.

Kolasib District Bawrhsap John LT. Sanga chuan School of Nursing, Thingdawl (SONT)  chu nimin khan tlawhin Nursing School-a zirlaite nen inkawmna an nei a, SONT hi Mizoram sawr-kar hnuaia GNM School pahnihna ni turin kum 2017 khan hawn a ni a, mi 37 in zirchhuak tawhin zirlai 61 an awm mek a ni.

Mizoram State Election Commission (SEC) chuan Lunglei Municipal Council (LMC) inthlan buatsaih turin hmalakna a kalpui mek a, he inthlanna a hman tur Electoral Roll Revision neih tur atan nimin khan Lunglei District Election Officer Kulothungan A hovin mi pawimawh te an thu-khawm a, Electoral Roll Revision neih tur atan hian tun thla ni 23 khian Draft Electoral Roll chu tarchhuah a ni dawn a ni. LMC inthlan neih tur atana SEC in sum mamawh an thlen te pawh tun thla ni 13 khan pek a ni tawh bawk a ni.