Serchhip-ah District Bawrhsap hovin Faina a beihpui thlakna tur hawnna neih a ni

Serchhip District-a Faina Beihpui Thlakna, Swachhata Hi Seva, 2022 hawnna chu nimin zing khan Serchhip-a District Bawrhsap Nazuk Kumar IAS hovin neih a ni a. He beihpuithlakna hi thla thar October 2 thleng kalpui tur niin thingtlang khaw hrang hrangah Faina kawnga hmalakna leh inzirtirna kalpui a ni dawn a ni.

Swachhata Hi Seva, 2022 hawnna Serchhip DC Conference Hall-a neih ah hian District Bawrhsap Nazuk Kumar IAS chuan Mizoram chu India rama State fai ber te zinga mi kan nia a hriat thu sawiin, kan khawpui Aizawl pawh India rama tlangram khawpui zinga fai ber pakhat nia a hriat thu a sawi a, chutihrual chuan Faina leh thianghlimna kawngah hian hmasawnna tur tam tak kan la nei thung tih a sawiin, chung zinga pawimawh tak mai chu mipui nawlpui nunphunga faina nunpui ngheh tlat mai hi a ni, a ti. Bawrhsap chuan a hmun taka bawlhhlawh paih te, fel taka bawlhhlawh thliarhran te, hman khat daih plastic khapna tha taka zawm te, kan lui leh tuihnar tihthianghlim te, kan bawlhhlawhin kan ram leilung a tihchhiat theihna laka inveng renga bawlhhlawh tihral te chu nitin nuna nghet taka zawm kan tum a ngai a ni, a ti a. Serchhip District chhunga faina lama hmalakna leh bawlhhlawh sawngbawlna hmun buatsaih dan tlangpui a tarlang bawk a. He huna tel College zirlai naupangte chu faina lama mite entawn tlaka nunga, mite zirtirtu nih tum tlat tura chahin, ka faina hian kan hmalam hun a hril thui hle a ni, a ti bawk.

He hun kaihruaitu PHE Serchhip WATSAN Division-a EE, Er. Isaac Lalchhuanmawia chuan sawrkar laipui hmalakna in rampum Faina kawnga hmalakna tam tak a lo awm tawh thu sawiin, Central Rural Sanitation Programme (CRSP)-1986 te, Total Sanitation Campaign (TSC)-1999 leh Nirmal Bharat Abhiyan (NBA)-2012 lo awm tawh mahse faina kawnga kan thlen chin chu hniam tak a ni reng tih a sawi a. Narendra Modi chu India Prime Minister a nih hnuah ram hrang hrang a tlawhkualna lamah faina kawnga India ram hnufum zia leh hmabak ko zia a hmuhin a hma zawng aia faina lama beihpui thlak tak takna programme, Swachh Bharat Mission (Grameen) 2014-2019 a lo piang ta tih a sawi.

He Mission in a tum ber chu India ram hi ek In nilova inthiar mai mai awm tawh lohna Open Defication Free (ODF) a siam a ni tih sawiin, he mi chhung hian Ek In pawh vbc. 10.28 zet siam niin October 2, 2019-ah chuan India rama District zawng zawng chu ODF a puan niin Mizo-ram State bil chu March 31, 2018-ah ODF kan nih thu a sawi a. SBM (G) pangngai a zawh hnuin kum 2020 atang khan SBM (G) Plus chhungah lut lehin, he Mission in a tum ber chu ‘ODF ni tawh khua te an nihna vawn nun zel te, bawlhhlawlh sakhat leh tuiril (Solid & Liquid Water Management) buaipui te leh hmuh mai theiha khawtlang faina (Visual Cleanliness)’ te a nih thu a sawi bawk.

Kumin-a Faina beihpui thlak (Swachhata Hi Seva) hi nimin, September 15, 2022 atanga October 2, 2022 thlenga hman tur niin thupui (Theme) atan ‘Visual Cleanliness in Villages’ (Hmuh theih khawpa Khawtlang Tihfai) tih a ni a. Hemi hun chhung hian Thingtlang khaw hrang hrangah WATSAN Committee te bul tumin Faina hnatlang hrang hrang leh Awarness Campaign te nei tur beisei an ni.

He huna tarlan a nih danin Swachh Bharat Mission (Grameen) hnuaiah hian Serchhip District-ah mimal Ek In 1788 sak ni tawhin School a inthiarna 75, Bawlhhlawh paihna 36 leh Vantlang inthiarna 35 sak a ni tawh a. SBM (G) Plus hnuaiah mimal Ek In 66 sak ni tawh bawkin East Lungdar RD Block chhunga khaw 11-ah thli paihna khur (Community Soak Pit) 47 siam a nih tawh bakah Plastic lam chi sawngbawlna hmun Thenzawl-a siam mekah hna thawh tur za zela 95 zawh a ni tawh bawk a. District chhungah Bawlhhlawh Khur intawm 108 siam leh tum mek a ni bawk.