Poshan Maah pualin Serchhip-ah ‘Mother's Kitchen Contest’ leh ‘Indegenious Toy Fair’ neih a ni

Ramchhunga ‘Poshan Maah’ (Nutrition Month) hman mek pualin nimin khan Serchhip-ah ‘Mother's Kitchen Contest’ leh ‘Indegenious Toy Fair’ neih a ni.
‘Mother's Kitchen Contest’ hi Serchhip ICDS Project bultumin BNRGSK Hall, Serchhip P&E Veng-ah hman niin he hun hi Serchhip ICDS Projeect-a CDPO Caryll Lalpari chuan a kaihruai a, ei leh in chhia leh kan taksa mamawh kan ei loh avangin kan hriselna kawngah harsatna hrang hrang kan tawk thin tih sawiin, hemi umbona atan hian sawrkar laipui chuan Poshan Abhiyan kalpuiin hemi hnuaiah hian tuna an hmalakna chu kalpui a ni tih a sawi a. He hunah hian Anganwadi Workers leh ei siam lama tui mi 16 ten eitur an siam te phochhuakin heng te hi mithiam ten Tri-Colour Thali (eitur hrisel rawng chi thum-a hring, a var leh a sen) te, Mizo chaw tha pangngai thatna chungchang (promotion of traditional foods) leh Man tam silo a chaw tha siamdan (Low budget) tih te hmanga endikin, heng atanga tithate tan lawmman siam a ni dawn a, tun thla ni 30-ah Poshan Maah kharna hunah lawmman sem a ni dawn a ni.

Hemi hnu hian a hmun ngai ah Mizo naupang ten infiamna hmanrua an neih thin phochhuah leh a hmandan leh sawifiahna hun, ‘Indegenious Toy Fair’ chu neih leh a ni a, he hunah hian Serchhip ICDS Project-a CDPO Caryll Lalpari chuan tun tumah hian an Project huamchhunga Anganwadi Centre 100 atangin 90 vel ten an naupang infiamna an rawn phochhuah thu sawiin, an tinzawn ber naupang kum 6 hnuailam te chu ei leh in leh infiamna duh reng an nih thu leh hei hi an taksa thanlen nan pawimawhin, midangte nena khawsak ho an zirna pawimawh tak a nih thu a sawi a. Hetianga tualchhuak infiamna te chawisan hi sawrkar laipui pawhin a duh avanga hetiang hun hi hmang an nih thu a sawi bawk a ni.

He hunah hian Anganwadi Centre hrang hrang atanga naupang infiamna an phochhuah te chu Thangngaizuala, Serchhip Chhim Veng chuan naupangte infiamna atana an hman thin dan leh a hmanrua an siam dan te he huna kalkhawmte a hrilhfiah a, hemi hnu hian he huna tel Anganwadi Workers leh naupangte chuan heng infiamna te hi a taka tiin Indegenious Toy Fair-a titha te hnenah hian lawmman pek tur a ni dawn bawk a ni.