Lenkawl

Tunhnaia mipa pakhatin hmeichhe nau paw lai nia lang a sawisa lai video, Social Media-a thehdarh chungchangah Mizoram State Commission for Women chuan MSCW Case (Suo moto) No. 45/2022 a ziaklut.

Serchhip District Magistrate Nazuk Kumar IAS chuan tun thla ni 10 khan thupek tichhuakin Mizoram hmun tam tak, a bikin Myanmar ramri hrul khuaah te China siam, Kenbo Bike kawl leh hmang thin an awm tih hriat a nih thu leh hetianga Foreign bike Myanmar atanga Mizoram chhunga dan lova lak luhhi phal a nih loh thu a tarlang a. Kenbo Bikes te hi dan kalh a lakluh an nih mai bakah mi thenkhatin sawrkar phal loh thil phurh velna atan an hmang fo thin tih hriat a ni bawk tih pawh tarlangin, Home Department thupek angin Serchhip District chhungah Kenbo Bike chelek leh hman khap tlat a ni tih a tarlang a. Dan lova Kenbo Bike lo kawl te chu Motors Vehicle Act 1988 tlawhchhan in an chungah hremna lekkawh a nih tur thu a tarlang bawk.

Nimin khan Serchhip DC Meeting Hall-ah District Level Coordination Committee for FOCUS, Serchhip District chu an thukhawm a, he hunah hian kum 2021-2022 chhunga an hmalakna te thlirho niin kum 2022-2023 chhunga Annual Work Plan & Budget te thlirho a ni bawk.

Nimin khan Serchhip District-a khaw 5-ah COVID-19 hri kai mi 9 hmuh belh niin hri kai te zingah mi 19 te chhuahtir an ni thung.

Taxation Department chuan nimin khan Ser-chhip-a sumdawng lian, GST hnuaia Tax Registration ti te tan Chhiah an pek dan Audit leh Assessment tih dan zirhona an buatsaih.

Tuikum bialtu MLA leh Assembly Deputy Speaker Er. Lalrinawma chuan nimin khan a bial chhung Darlawng khua-ah Health Clinic Centre thar a hawng.

Nimin khan Serchhip District-ah ASF vanga Vawk thi leh Vawk suat a awm belh lova, heti hian kumin ah ASF vanga Serchhip District a Vawk thi chu 256 niin Vawk 371 suat a ni tawh a, chhan hriatloh a Vawk thi 23 awm tawhin  ASF nia rinhlelh Vawk 4 suat a ni tawh bawk.

Lunglei District-a Vaisam, Chithar leh Lungsen khuaa zirtirtu indaihlohna avanga harsatna tawh mek chinfel theih dan tur ngaihtuahin nimin khan Lunglei DC Conference Hall-ah Lunglei South bialtu MLA Dr. K. Pachhunga hovin District thuneitute leh Education Department hotute chu an thukhawm a. Vaisam leh Chithar-ah te hian zirtirtu indaihlohna avangin nu leh pa ten School hi an lo khar tawh a, Lungsen-ah pawh nimin atang khan High School chu khar a ni bawk.

BJP Mizoram Pradesh chuan tunhnai phailam Media thenkhata India Constitution thar buatsaih chungchang chu Mizoram-ah mi thenkhatin BJP beihna hmanrua ah an sawilut niin an sawi a. Hemi chungchang thehdarhtute hi manchhuah an nih theih nan nimin khan FIR an thehlut bawk.

Nimin khan Mamit-ah District Bawrhsap Lalnunhlua hovin District Consultative Committee/ District Level Review Committee/ District Level Security Committee chu thukhawmin an District chhunga Bank hrang hrangte hmalak dan an thlirho a. He huna tarlan a nih danin March 2022 thla tawp thleng Quarter-ah khan CD Ratio chu 69.2% a ni a, PMJDY-ah enrolment ti mi 29,249 awmin, PMJJBY-ah mi 12,869 leh PMSBY-ah mi 21,324 bakah APY-ah mi 663 an awm a. District chhung mipuite population ngaihtuahin enrolment hi ala tlem avangin Bank hrang hrangte chu tan la tura hrilh an ni.