Tuikum bialtu MLA in a bial-a Darlawng-ah Health Clinic Centre thar a hawng

Tuikum bialtu MLA leh Assembly Deputy Speaker Er. Lalrinawma chuan nimin khan a bial chhung Darlawng khua-ah Health Clinic Centre thar a hawng. Darlawng Health Clinic Centre hawnna puala inkhawm Clinic Centre-a neih ah bialtu MLA chuan khawtlang mipuite inpekna leh thawhhona tha tak zarah Health Clinic Centre thar an hawng thei ta tih sawiin, Centre a awm theih nana tha leh zung sengtute zawng zawng chungah lawmthu a sawi bakah sawrkar in Health Clinic din phalna a pek avangin lawmthu a sawi bawk. Deputy Speaker chuan a bial chhung hmasawnna atan Zirna, eizawnna leh hriselna te chu a thil ngaihpawimawh ber ber te an nih reng thu a tarlangin, zirna lamah leh eizawnna kawng, Thlawhhma lamah pawh nasa taka hmalak mek a nih thu a sawi a. Tuna an hawn tak Health Clinic Centre chuan Darlawng mipuite hriselna kawngah nasa taka a tanpui a beisei tih sawiin, mipuite pawhin lo pan a, lo hmang tangkaia, a hmunhma leh building enkawl zui kawngah pawh theihtawp lo chhuah zui turin a chah a ni.

Health Clinic Centre thar hawnna inkhawm hi Darlawng VCP C. Zonunsanga chuan kaihruaiin Thingsulthliah PHC-a Medical Officer Dr. Lawrence Lalramenga chuan tunhnaiah Thingsulthliah PHC hnuaiah Buhkangkawn leh Hmawngkawn-ah Health Clinic Centre hawn thar an nih hnua Darlawng-ah hawn a ni leh ta chu lawmawm a tih thu a sawi a, hetianga hmasawnna duhawm tak tak a thlen theih nana beitu bialtu MLA leh Deputy Speaker Er. Lalrinawma chungah lawmthu a sawi a. Mipuite kan hrisel loh chuan kan thawhchhuah a pung thei lova, hmasawnna a awm thei tak tak thin lo tih sawiin, chuvang chuan hriselna hi thil pawimawh hmasa a nih thu a sawi a, mipuite pawhin an nitin nunkawngah nunphung hrisel zawk an uar deuh deuh a tul tih a sawi a, harsatna an tawh changin damdawi In pan vat nachang kan hriat pawh a tul thu sawiin, he Centre thar pawh hi Darlawng mipuite chu lo hmang tangkai zel turin a chah bawk.

He hunah hian Darlawng VC Secretary Lalthakima chuan Report pe in Health Clinic nei tur hian Development Committee dinin mipui inrawnkhawmna (Gram Shabha) neiin mipui kalkhawm chuan mipui sum thawhkhawm cheng nuai 4 hman an remti tih a sawi a, chumi hmang chuan bul tanin tun thlenga an sum hman tawh zat chu Rs. 6,09,751/- a nih thu a sawi a. Hnatlang tum 5 neiin tha 290 an seng a, hlawhfa tha 278 seng tawhin hnatlang phatna Rs. 9200/- an dawng bawk a, Centre chung tur Rangva hi Bialtu MLA in a tum sak bakah thawktu, Health Worker rawihna man hi Bialtu MLA hian a tum dawn bawk a ni.

Darlawng Health Clinic hi Thingsulthliah Primary Health Centre (PHC) hnuaia awm tur niin Tlungvel Sub-Centre in an enkawl tel anga, Thingsulthliah PHC hnuaiah hian Sub-Centre 6 leh Health Clinic 5 awmin Tuikum bial chhungah hian tunhnaiah Vanchengte, Buhkawngkawn leh Hmawngkawn-ah te Health Clinic Centre hi hawn a lo ni tawh a ni.