Video thehdarh chungchang ah thubuai ziahluh a ni

Tunhnaia mipa pakhatin hmeichhe nau paw lai nia lang a sawisa lai video, Social Media-a thehdarh chungchangah Mizoram State Commission for Women chuan MSCW Case (Suo moto) No. 45/2022 a ziaklut.

Hemi chungchanga nimin a Order a tihchhuah ah Mizoram State Commission for Women chuan August 15, 2022 khan Social Media-ah mipa pakhatin hmeichhe pakhat nau paw lai nia lang chu a sawisa lai video, second 30 vel bawra sei chu vawrh darh a ni tih tarlangin, Video-ah chuan Mizo tawng an hman avangin he thil thleng hi Mizoram chhung ngeia thleng nia ngaih theih a ni tih a tarlang a. Hetianga insawisak thleng hi MSWC chuan a ngai thutak leh tih tarlangin, Dan bawhchhiatna a awm ngei nia a lan avangin thubuai ziahluh a nih thu hi a tarlang a ni.

He Video-a lo lang hi rang taka chhui chian a nih theih nan leh a tak ngeia thleng a lo nih chuan pawikhawihtu hi a rang thei ang bera man a, dan anga hremna pek a nih ngei theih nan theih-tawp chhuaha hma la turin Commission chuan State Police-te a beisei thu leh Director General of Police (DGP), Mizoram chu a tul anga rang taka hma la turin a hriattir a, Police te hmalakna thlen chin kimchang hi he Order tihchhuah a nih atanga ni sarih (7) chhungin MSWC-a hriattir tura beisei a nih thu a tarlang bawk.

He thil thleng hi Mizoram Police chuan ngawrh taka chhui zui nghalin he thil thlenna nia Social Media lama tarlan te pawh umzui nghal zel a ni a, hmeichhia kutthlaktu nia hriat Lalramdinsanga (25), Siahatlah-II, Siaha chu nimin khan Police ten an man nia thudawn niin  lakah thubuai ziahluh nghal a ni. Thudawn danin he thil hi tun thla ni 13-a thleng kha niin Video-a thla latu leh Social Media-a tarlangtu pawh hriat a ni tawh nia thudawn a ni bawk.