COVID-19 enkawllai 26 awm

Nimin khan Serchhip District-a khaw 5-ah COVID-19 hri kai mi 9 hmuh belh niin hri kai te zingah mi 19 te chhuahtir an ni thung.

Nimin-a Serchhip District-a COVID-19 hri kai hmuh thar mi 9 zinga pathum te hi Serchhip khawpui chhunga mi te niin Serchhip Hmar Veng-ah mi pahnih leh Chhim Veng-ah hri kai mi pakhat hmuh an ni a. Heng bakah hian Thenzawl-ah hri kai mi 3 bawk hmuh niin North Vanlaiphai, Khawlailung leh East Lungdar-ah hri kai mi pakhat theuh hmuh belh an ni bawk.

Nimin khan Serchhip District-a hri kai mi 19 te chu anmahni enkawlna hmun atanga chhuahtir an ni a, an zinga mi 8 te chu Khawbel khua niin East Lungdar-ah mi 5 chhuahtir an ni a, Lungpho, Thenzawl, North Vanlaiphai, Piler leh Thinglian bakah Serchhip Hmar Veng atangin hri kai mi pakhat theuh enkawl dam an ni bawk.

Heti hian nimin thleng khan Serchhip District-a COVID-19 hri kai hmuhchhuah tawh chu 14,445 niin an zinga 14,384 chu enkawl dam an ni tawh a, hri kai hmuhchhuah atanga chhutin za zela 99.45 te chu enkawl dam ni tawhin hri kai enkawllai mi 26 an la awm a, hri kai zingah mi 35 an boral tawh bawk a ni. Serchhip District-ah Serchhip chu hri kai enkawllai tamna ber ni mekin Hmar Veng-ah mi 4 leh P&E Veng, Zozam Veng leh Chhim Veng-ah mi pakhat theuh, an vaiin mi 7 enkawllai an la awm a, Thenzawl leh Khawbel-ah mi 5 ve ve enkawllai la awmin East Lungdar, Lungpho leh North Vanlaiphai-ah mi 2 theuh enkawllai an la awm bawk a, Thing-lian, Sialhau leh Khawlailung-ah mi pakhat theuh enkawllai an la awm bawk a ni.