GST chungchang zirhona nei

Taxation Department chuan nimin khan Ser-chhip-a sumdawng lian, GST hnuaia Tax Registration ti te tan Chhiah an pek dan Audit leh Assessment tih dan zirhona an buatsaih.
Serchhip CMO Conference Hall-a 'GST Training on Audit and Assessment' hi Serchhip-a Deputy Commissioner of State Tax K. Lalrohluna chuan a kaihruai a, Resource Person atan Asst. Commissioner of State Tax Vanlalruata Ralte leh State Tax Officer Rebecca Zosangluri Pachuau te hman an ni a, anni hian he huna tel sumdawng te chu GST danin a sawi anga Assessment and Audit kalpui anih tawh tur thu, hremna hrang hrang awm theite leh GST Account dealer-te mawhphurhna a nih dan te an sawi a. Sumdawngte chu rinawm taka Chhiah pe tur leh GST chu computer hmang veka thawh a nih tawh avangin an User ID leh password te, an Email ID leh phone number hman te midang hnena pe lo turin an hriattir a. Chhiah pe tha duh lo te, pek tur aia tlem pe thin te chu dan anga khauh zawka enkawl a, a tul ang zela an thil neih leh bungruate che thei lo tura hrensak (freeze) thlenga hmalak an tum thu sumdawngte hi an hrilh a ni.