Lenkawl

CM in lungphum a phum

Ministry of AYUSH buatsaihin ‘Webinar on National AYUSH Mission & Opera-tionalization of AYUSH Health & Wellness Centres under Ayushman Bharat’ chu nimin khan neih niin Mizoram atangin Health Minister, Dr. R. Lalthangliana pawh a tel a ni.

Autonous District Council huamchhung tihloh Mizoram District hrang hrangah Village Council (VC) inthlan hun tur hriat la ni lo mah se niminpiah khan District hrang hrangah VC inthlanpui-a hman tur Electoral Roll tlangzarh a ni.

Niminpiah-a Mizoram-a Swab Samplen enfiah atangin COVID-19 hri kai mi 3 hmuh belh leh an ni a, Mizoram-a hri kai hmuhchhuah chu 398 an tling tawh.

Chief Minister Zoramthanga chuan nimin khan Aizawl-a Zoram Infrastructure and Industrial Development Corporation Ltd. (ZIDCO) Office tlawhin ZIDCO-a thawktute chu Mizoram hmasawnna atana mawhphurhna lian tak an neih thu a sawi a, thahnemngai taka thawk turin a fuih bawk.

Serchhip-a Sub-Division Police Officer (SDPO), Victor Zothansanga chu Dy. SP, Airport Security hna chelh tura sawn a ni a, a aiawh tur erawh dah an la ni rihlo thung.

COVID-19 chungchanga Serchhip DC Office-a Officer te hna chanpual chu siam danglam niin Serchhip District atanga State pawna chhuak tur leh rawn lut tur Movement Permit mamawh te tan Dr. Manesia Khaimeichho, SDC bial tur niin a Phone No. chu 8416048257 a ni a. Quarantine Facilities kaihhnawih thilah F. Lalnisai, SDC biak tur niin a Phone No. chu 7048922407 a ni bawk ang.

Serchhip District chhunga ‘Programatic-Mapping and Population Size Estimation-2020’ (p-MPSE) kalpui turin nimin khan Serchhip CMO, Dr. Laldawngliana Sailo chuan a hawng.

Nimin July 30, 2020 kha Baptist Church of Mizoram (BCM) hnuaia Thalai Kristian Pawl (TKP) dinchampha vawi 69-na niin kumdang anga a lawmna erawh neih theih a nilo thung.

Dedicated COVID Health Centre (DCHC) Serchhip-a COVID-19 hri kai enkawllai mi 5 te chu hri lakah an fihlim vek ta a, an zinga mi 4 te chu nimin khan DCHC atang hian chhuahtir an ni.