Lenkawl

Health Minister, Dr. R. Lalthangliana chuan Mobile Food Testing Laboratory (Food Safety on Wheels) chu nimin khan Aizawl-a MINECO kawtzawl-a Programme buatsaihah mipui hman theih turin a tlangzarh a. Hmun hrang hranga kal kual thei ei leh in tur enfiahna chu tangkai taka hman a nih a beisei thu a sawi bawk.

Sports & Youth Service Minister, Robert Romawia Royte chuan nimin khan Muallungthu Hockey Ground-a Synthetic Turf phahna tur lungphum a phum.

Niminpiah-a ZMC Laboratory-a Sample enfiah te atangin COVID-19 hri kai mi 23 hmuh belh leh an ni a, an vai hian Aizawl District mi leh sa vek an ni.

Mizoram-ah Green Ag hawng

Mizoram-a The Mizoram (Containment and Prevention of Covid-19) Ordinance, 2020 hman tan, May 4, 2020 atanga nimin thleng khan Mizoram-ah he Dan bawhchhia hi mi 28,060 man an ni tawh a, heng mite pawisa chawi tlingkhawm pawh Rs. 50,57,500/- a tling tawh bawk a, Dan bawhchhia zingah hian Mask hmanglo an tam ber a ni.

Serchhip District chhunga COVID-19 hri kai enkawl mi 2 te chu enkawl dam an nih hnuah nimin khan chhuahtir an ni.

Serchip District chhunga Common Service Centre-Village Level Entreprenuer (CSC-VLE) te tan nimin khan an hnathawh dan chungchang zirhona Serchhip DC Conference Hall-ah neih a ni a, he hunah hian District Manager, CHT. Changrenga leh E-District a District Manager, Denghlira ten CSC kaltlanga Online hmanga Form pekchhuah dan hrang hrangte an zirtir a ni. Tun dinhmunah Serchhip District-ah CSC-VLE hna thawklai mi 27 an awm mek a, heng zinga 7 te hi CSC-VLE,Self Help Group-a lut te an ni.

Ministry of Rural Development hnuaia National Social Assistant Programe (NSAP) hnuaia BPL chhungkaw zinga eizawngtu ber boral ta te tana hamthatna dawn theihna tur, National Family Benifet Scheme (NFBS) hnuaia tanpuina dawng turin Serchhip District-ah mi 12 thlan an ni.

National Rural Livelihood Mission (NULM) hnuaia Serchhip khawpui chhunga Self-Employment Programme (SEP) atanga Individual Enterprise Loan la turte tana Entrepreneurship Development Programme (EDP) Training chu niin khan Serchhip Auditorium-ah neih tan a ni.

Serchhip Division Horticulture Officer (DHO), M. Vanlalzami chuan phailam atanga Tomato lakluh titawp thei tur khawpin Tomato chin kawngah hmalak tum a nih thu a sawi.

Nimin thleng khan Serchhip District-ah mi 663 te Swab Sample lak a ni tawh a, heng zinga 654 te chu enfiah tura thawn niin result hriat vek a ni tawh a, Sample thawnloh 9 ala awm mek bawk.

Tun dinhmun ah Serchhip District chhunga inkhunghranna hmun hrang hranga inkhunghrang mi 128 an awm mek.

Serchhip District Retailer Association te chuan COVID-19 hri leng dona atana a tul anga hman turin nimin khan CM Relief Fund-ah Rs. 25,000/- an hlan.

Serchhip-a Legal Metrology Enforcement Staff te chuan sawrkar kum liamta chhung khan tuialhthei leh eirawngbawlna Gas rawn phurh thlen thahnem tak bakah sumdawng ten bukna leh tehna an hman hrang hrangte an enfiah bawk.

MPC Party leh PRISM Party aiawh mi pathum (3) ve ve te chu nimin khan Aizawl-a MPC Office-ah thukhawmin COVID-19 hri lêng do nana mi thahnemngâi te sum thawhkhawm, Chief Minister Relief Fund-a sum tlingkhawm te a hmanna tur diktaka hman a ni em tih chhuichian a hmalak a ngaih thu an rel a, hei bakah hian Electric bill sang lutuk an ngaimawh thu te, sawrkar hnathawk hlawh cut sak chhunzawm zel vei awm an tih thu te an sawi bawk. He thutkhawm hi MPC Consultant, R. Zatawna chuan kaihruaiin Party pahnihte inzawmkhawm dan tur chungchang pawh he hunah hian thlirho nghal a nih thu an sawi bawk.

India rama COVID-19 hri kai hmuhchhuah chu nuai 14 an chuang ta a, darkar 24 kalta chhung khan hri kai hmuhchhuah thar sing nga dawn an awm leh a ni.

Nimin tlai dar 5:00 thleng khan Mizoram-a mi 20,053 te Swab Sample enfiah tawh ah hri kai hmuhchhuah 361 awm tawhin mi 193 enkawl dam an ni tawh a, mi 168 enkawl mek an ni.

Mizoram Lok Sabha MP leh Telephone Advisory Committee (TAC) Chairman, C. Lalrosanga chuan nimin khan Aizawl-a BSNL Office tlawhin, BSNL Staff ten an dinhmun leh an harsatna te an lo thlen.

Minister in Zokhawthar tlawh

Thla thar August 15-a India Independence Day lo thleng tur chu Mizoram sawrkar-a Minister hrang hrang ten District khawpui tinah an hmanpui leh dawn a, Serchhip-ah Home Minister, Lalchamliana chu khuallian a ni ang.