Lenkawl

Mizo siam Face Mask

Bilkhawthlir South Village Organisation in Kuhva kau atanga an siam Thleng 500 chu nimin khan Serchhip District Task Force on COVID-19 Chairman leh District Bawrhsap, Dr. Lalzirmawia Chhangte hnenah an hlan a, Bawrhsap chuan lawmthu a sawi.

Nimin khan Serchhip District chhungah vantlang hmuna Hmai tuam lova chhuak mi 19 zet man leh an ni. Serchhip District Police te chuan The Mizoram (Containment and Prevention of Covid-19) Ordinance, 2020 bawhchhia mi 19 zet an man leh a, heng an man te hi Serchhip-ah mi 7, Thenzawl-ah mi 6, Chhingchhip-ah mi 4 leh North Vanlaiphai-ah mi 2 te an ni a, heng mite hi Rs. 100/- theuh chawitir leh an ni bawk.

Serchhip District chhunga inkhunghranna hmun hrang hrangah mi 111 khunghran awm mekin nizan khan mi 50 chuang dahluh hman beisei a ni.

Serchhip District Bawrhsap, Dr. Lalzirmawia Chhangte chuan Community Quarantine Facility atana Kohhran ten an hmunhma leh Hall te hman an phal bakah an buaipuina ah lawmthu a sawi.

Serchhip Kawlri tlang, Eklavya Model Residential School (EMRS)-a Quarantine Facility Centre-a tui pump-na khawl chu a thar-a thlak a nih avang leh niminpiah-ah Power Supply a mumalloh avangin helai hmun-a awm te hian niminpiah khan Tui an dawng mumal thei lova, he harsatna hi sutkian a ni tawh.

Kumin a HSLC Exam Result tihchhuah taka Top-10 a lang Mizo zirlai te chawimawina hun chu nizan hmasa khan MZP General Hqrs. chuan an buatsaih.

Rampum-a inkharkhip kalpui a nih avanga Mizoram mi tangkhang hruai haw mekah nizan hmasa khan Delhi-a tangkhang mi 1,402 te chuan Screening an paltlang hnuah Mizoram an rawn pan.

Mizoram sawrkar-a School Education Department chuan an Department hnuaia thawk Zirtirtu zawng zawngte chu mahni awmna Khua leh Veng theuhah he hrileng dona kawnga theihtawp lo chhuaha, Task Force Duty te lo puibawm-a a tul apiang thawk turin a ngen.

Rampum-a inkharkhip kalpui mek avanga Mizoram mi leh sa hruaihaw hna thawh mekah Karnataka-a Mizoram mi leh sa tangkhang, Shramik Train hmanga lo haw mi 1452 te chuan nimin zing khan Bairabi Rel chawlhhmun an lo thleng a, Madhya Pradesh leh Gujarat atanga lo chhuakte pawhin nimin chhun dar 12:50 khan Bairabi hi an rawn thleng bawk.