NBM sum cheng nuai 252.826 senga din Mau sawngbawlna tur Chief Minister in a hawng

Chief Minister Lalduhoma chuan nimin khan Sairang-a Horticulture Centre-ah National Bamboo Missions sum cheng nuai 252.826 senga din ‘Bamboo Treatment & Seasoning Plant’, ‘Bamboo Depot & Godown’ leh ‘Activated Charcoal Unit’ (Meihawl siamna) te chu a hawng.

Heng Mau sawngbawlna khawl hrang hrang hawnna hunah hian Chief Minister Lalduhoma chuan National Bamboo Mission (NBM) hmalakna hmanga Mau sawngbawlna thar kan nei ta chu lawmawm a tih thu sawiin, “Mau hi kan ramin resource kan neih that a ni a, a chhawr pawh kan chhawr tangkai a. Tunlai mila kan hman thiam zel hian kan economy tithatu, eizawnna tam tak min siamsaktu a ni thei a ni,” a ti a. Mau chu a treatment plant atanga sawngbawl tawh te chu kum 50 thleng hman theih tura ngaih a ni tih sawiin, an khawl hawn te chu Mau hmanga thil siam thin te tan a hlu hle ang tih a sawi a. Hei bakah hian meihawl kan siamna hnar ber chu Thing a ni thin tih pawh sawiin, “Thing rawn puitlin hun chhung hi a rei a, Mau erawh chu kum hnih khat lekah an rawn lian leh mai a, a zung nena kan kar a nih loh phei chuan an thi hlei thei lo. Chuvang chuan Meihawl siam nana Mau kan hman hian kan ramngaw chereu chak lutuk tur kha kan veng a ni,” a ti bawk.

Chief Minister chuan sawrkar enkawl Factory leh Plant te chu an dam chhuak tha lo thin hle tih pawh sawiin, “Vawiin-a kan Unit hawn pawh hi Department lamin in enkawl phawt dawn a nih hmel a. Tha takin lo enkawl ula, tangkai takin hna lo thawk ngei se kan duh a ni,” a ti bawk.

Nimin-a hawn tak ‘Bamboo treatment and seasoning plant’ hi hun rei zawk Mau dahthat a nih theihna tura sawngbawlna a ni a, NBM 2018-2029 sum cheng nuai 10 senga din a ni a, a Project-ah hian a khawl man bakah a In leh chemical man zawng zawng telin In hi a dung ft. 40 leh a vang ft. 20-a zau in sak a ni a. He Centre-ah hian Vaccum pressure hmangin Mau te hi dam-dawi (Copper Azole) hmanga sawngbawl an ni dawn a, Mau te hi Thlasik-a sah ni lo pawh nise a puitling (kum 4 chunglam) chu eng hunah pawh sawngbawl theih a ni ang.

‘Bamboo Depot and Godown’ pawh hi NBM Scheme hnuaia kum 2018-2019 sum cheng nuai 50 senga din a ni a, a building hi a dung ft. 30 leh a vang ft. 20 niin a hmunhma buatsaihna zawng zawng leh Workers Toilet leh thil pawimawh dangte siam a ni a. He Project bik hi Mau sawng-bawl tur dahkhawmna leh sawngbawl sa dahna atan te, Mau atanga helai hmuna thil siam hrang hrang dah nana tih a ni a. Bamboo chipping tih nan leh Chip sa dah nan hman a ni bawk.

‘Activated Carbon Product Unit’ hi NBM sum cheng nuai 192.826 hmanga siam niin he Project hnuaiah hian a khawl bakah a building sakna a tel a, building hi a dung ft. 80 leh a vang ft. 40-a zau a sak a ni a, helai hmun atang hian ni khatah meihawl Tonnes 3 siamchhuah theih niin kum khatah ni 300 hna thawk anga chhutin Tonnes 900 siam theih tura ngaih a ni a, Meihawl Tonnes 3 siamna atan hian Mau pum 670 (pum khat kg. 16 anga chhutin) vel mamawh tura chhut a ni.

Meihawl (charcoal) siam rual hian by-product vinegar a chhuak ve zel a, nitin meihawl Tonnes 3 rual hian Vinegar litre 107 a chhuak a, hei hi ‘Tar’ nen inpawlh filter ngai niin Distillation tih zawh hnuah vinegar hmantlak litre 54 a chhuak thei bawk. Tunah hian Charcoal Unit Cluster hi pathum (3) neiin Chhingchhip Cluster (5 bamboo farmer); Baktawng Cluster (24 bamboo farmer) leh Saiphal Cluster (114 bamboo farmer) te an ni.

Nimin-a heng khawl hawnna hun hi Special Secretary Ramdinliani IAS chuan kaihruaiin Khual zahawm Horticulture Minister C. Lalsawivunga leh State Bamboo Missions leh Horticulture Department-a Director CH. Lalmuanpuia te pawhin thu an sawi a ni.