Nikum chhunga Serchhip District Police te thubuai ziahluh ah rukruk leh a kaihhnawih a tam ber

Kum kalta 2024 chhung khan Serchhip District chhungah Police ten thubuai 191 ziaklutin heng zinga 172-ah chuan nikum chhung khan Chargesheet thehluh hman a ni a, thubuai ziahluh zawng zawng atanga za zela 64 vel zet chu rukruk leh a kaihhnawih thubuai a ni.
Serchhip SP Office atanga LENKAWL in thu a dawn danin kum kalta 2024 chhung khan Serchhip District chhunga Police Station hrang hrangah thubuai 191 ziahluh a ni a, heng zinga 172 te chu chhui zo tawhin nikum chhung vek khan Court-ah Chargesheet thehluh a ni a, thubuai 14-ah Final Report siamin thubuai 5 te chu chhui mek an ni bawk. Serchhip District Police ten nikum chhunga thubuai an ziahluh 191 zingah hian thubuai 153 te chu IPC hnuaia ziahluh a ni a, heng zingah hian rukruk leh a kaihhnawih thubuai chu tam berin thubuai 123 zet ziahluh a ni a, heng te hi Burglary-ah thubuai 48 leh Theft-ah thubuai 75 te a ni a, rukruk leh a kaihhnawih a thubuai ziahluh hi thubuai ziahluh zawng zawng atanga chhutin za zela 64.39 zet a tling phak a ni.

IPC hnuaia rukruk kaihhnawih a thubuai ziahluh tam leh chu lirthei chetsualna niin thubuai 7 zet ziahluh a ni bawk a, Hurt leh Mischief-ah thubuai pathum ve ve ziahluh niin tualthah thubuai pahnih ziahluh a ni a, IPC 188 bawhchhiatna thubuai pahnih ziahluh niin pawngsual thubuai pakhat ziahluh a awm bawk a, heng bakah hian Jail tang tlanchhuak ah thubuai pakhat ziahluh awm bawkin thubuai thenkhat pakhat te te ziahluh a awm bawk a ni.

Non-IPC, Local & Special Law hnuaiah nikum chhung khan thubuai 38 ziahluh awm bawkin heng zingah thubuai 34-ah te chuan Chargesheet thehluh a ni tawh a, Non-IPC hnuaia thubuai ziahluh zingah hian Zu leh a kaihhnawih a thubuai MLP Act hnuaia ziahluh tam berin thubuai 17 ziahluh niin chhui zawh vek a ni tawh a, ruihhlo leh a kaihhnawih thubuai ND&PS Act hnuaia ziahluh in dawtin thubuai 12 ziahluh a ni a, heng zinga 11 te chu chhui zo tawhin Chargesheet thehluh hman a ni a, thubuai pakhat chhui mek a la ni thung. Hursualna laka naupangte humhimna dan, POCSO Act hnuaiah nikum chhung khan Serchhip District-ah thubuai 5 ziahluh niin heng zinga pali te chu Chergesheet siam hman a ni a, Silai leh a kaihhnawih thubuai pathum ziahluh niin pahnih te chu chhui zui mek ala ni a, puakthei thil kaihhnawiha thubuai ziahluh pakhat erawh chargesheet peihfel a ni tawh bawk a ni.

Serchhip District chhungah hian Police Station pathum- Serchhip, Thenzawl leh North Vanlaiphai-ah te awmin East Lungdar-ah Beat Post leh Chhingchhip-ah Out-Post a awm a ni.