Misual leh Dan bawhchhia te hremna tur Dan thar pathum Vawiin-ah hman tan a ni dawn

Parliament in dan thar pathum a pass tak- Bharatiya Nyaya Sanhita (BNS), Bharatiya Nagarik Suraksha Sanhita (BNSS) leh Bharatiya Sakshya Adhiniyam (BSA) te chu Vawiin, July ni 1, 2024 atang hian India ram pumah hman tan a ni dawn ta a, hmun hrang hrangah a hawnna hun hman tur a ni ang.

Misual leh dan bawhchhiate hremna dan thar (Major Criminal Law) Bharatiya Nyaya Sanhita (BNS), Bharatiya Nagarik Suraksha Sanhita (BNSS) leh Bharatiya Sakshya Adhiniyam (BSA) hmang tur hian Mizoram Police leh Court lama thawkte nasa takin an inbuatsaih a. BNS hian kum 163 chhung lo hman tawh Indian Penal Code, 1860 a thlak anga, BNSS hian Code of Criminal Procedure, 1973 a thlak ang a, BSA hian Indian Evidence Act, 1872 a thlak dawn bawk a ni. BNS hian Section 358 a nei dawn a, a thlak tur IPC in Section 511 a nei a. Dan bawhchhiat theihna chi 20 belh niin, lung In tan theihna hi 33-a tihpun a ni bawk. Vantlang hna thawh (Community service)-a inhrem theihna tur dan bawhchhiatna chi 6 dah belh a ni a, inhrem ngei ngei ngaihna chi 23 dah belh a ni bawk. BNSS hnuaiah hian Police-in mi an kawl theih chhung hian dan bawhchhiat a zirin ni 15 atangin ni 90-ah tihpun a ni a. Amaherawhchu ni 15 bak kawl an duh chuan Police te hian a case khawihtu Court-ah phalna an dil hmasa phawt tur a ni a. BNSS hian Section 531 neiin a thlak tu CrPC-ah Section 484 a awm a ni.

Bharatiya Nyaya Sanhita (BNS) hnuaiah hian inhremna ah vantlang hnathawh tir (community service) awmin mipat hmeichhiatna hman khaw loh chungchangah kum 10 thleng lung In tan bakah pawisa chawitir te a tel a. Kum 1973 atanga hman tan Criminal Procedure Code (CrPC) thlaktu tur Bharatiya Nagarik Suraksha Sanhita (BNSS) ah hian thil tisuala puh, an chungchang ngaihtuah mek te chu vawi khat dan bawhchhiatna anih chuan Jail tang kher lo in Vantlang hna thawhtir (Community Service) a hrem theih a ni dawn a. Kum 7 chin chunglam tang turte chu an puhna-ah tihchianna Forensic (evidence) a ngai tawh dawn bawk a ni.

Hun rei tak Criminal Law kan lo hman tawh tihdanglam anih chhan ber chu Kumpinu sawrkar in min awp lai atanga tawngkam kan hman tam tak tihbo duhna leh India khua leh tui te rilrem zawnga herrem duhna vang a ni a. Technology thangchho zel avang leh kan Society a than zel anga sual chi thar, a hmaa dan a awm lo belh te leh finfiahna (evidence) Court in a pawm dan turah pawh tunlai technology thangchho zel mila kalphung thar belh te pawh a awm nual a, Video Conferencing hmanga evidence lak te, Police lam pawhin Evidence an neih te Digital Technology hmanga Court a thehluh a phal sak tawh dawn bawk a ni.

Heng Criminal Law tharte hi District leh Unit hrang hranga Police ten an hriatthiam leh an bel theihna turin Mizoram sawrkar pawhin nasa takin hma a la a, kawng hrang hranga inzirtirna kalpuiin Dan thar hman chungchanga hmalakna atan hian Mizoram Police hnuaiah Committee pawimawh panga- Legal Issues, Technology Upgradation, Training, Digital Investigation leh Financial Implication te din a ni.

Mipui nawlpui leh Police mi leh sa ngei te tan pawha inzirna turin heng Criminal Law thar atanga a pawimawh zual lawr khawmin Video siam a ni a. Lehkhabu leh thuziak te pawh siam niin hmun hrang hrangah thawn-darh a ni. Hei mai bakah hian Case IO te hman tur form Delhi Police in an siam te leh Police Organisation dangin FAQ an siam te pawh Mizoram mila siam danglam niin Unit tinah thawndarh a ni bawk a. District tin SP ten zirna In leh tlawmngai pawlte hnenah dan thar hman chungchanga inzirtirna chu Mizoram hmun hrang hrangah an nei bawk a ni.