Serchhip District-a Expenditure Observer turin Expenditure Monitoring Team hrang hrang a kawm

Mizoram Legislative Assembly Inthlanpui neih turah Serchip District chhunga Expenditure Observer atan Umesh Chandrakant Phade, IRS chu Election Commission of India chuan a ruat a, Inrinni khan Serchhip District chhunga Expenditure Monitoring a taka thawktu tur Team hrang hrangte chu thutkhawm a neihpui nghal.
Election Commission of India in Mizoram Legislative Assembly Inthlanpui neih tura Serchhip District chhunga Assembly Constituency pathum (3) te tana Expenditure Observer tura a ruat, Umesh Chandrakant Phade IRS hian Zirtawpni khan Serchhip rawn thlengin Inrinni khan Serchhip DC Conference Hall-ah Expenditure Monitoring a taka thawktu tur Team hrang hrangte kokhawmin thutkhawm a neihpui nghal a. He hunah hian Expenditure Observer Umesh Chandrakant Phade chuan inthlanna felfai, dik leh thianghlim a awm theihna turin MLA Candidate tin te inthlana senso chuan cheng nuai 28 a pel tur a ni lo tiin Election Commission of India chuan a bithliah thu a sawi a. Hei hian a tum ber chu party lian leh hausa zawk te leh party tenau leh sum nei tlem zawkte pawhin inthlanah intluk tlang thei ang bera an inkhin theihna tur hmanrua a nih thu a sawi a. ECI chuan Campaign na atan sum senso te uluk taka vil zui turin Team hrang hrang a din thu sawiin, chung Team hrang hrangte chuan an hna uluk leh taima takin an thawk tur a ni tih Observer chuan sawiin, mahni hna pawlawh taka thawk an lo awm a nih chuan an chungah action lak a nih tur thu a sawi bawk.

He thutkhawm hi Serchhip District-a Election Expenditure Monitoring Nodal Officer HD, Lalpekmawia chuan kaihruaiin Expenditure Observer chuan Expenditure Monitoring Team hrang hrangte inpuahchahna leh an nitin hnathawh te a zawt a. Harsatna an tawhte leh hmalak belh ngaite sawipuiin, thu zawhfiah duh leh hriat duh an neih chuan englai pawha amah an biakpawh theih reng tur thu a hrilh bawk.

Expenditure Observer hova thutkhawm ah hian Serchhip District Election Officer David Lalthantluanga’n kalkhawmte inhmelhriattirna hun hmangin Video Surveillance Team, Video Viewing Team, Accounting Team, Flying Squad, Static Surveillance Team, Assitant Expenditure Observer te, Excise Team leh Media Certification and Monitoring Committee (MCMC)-a Membee te an tel a ni.

Serchhip District chhunga Assembly Constituency pathum 26-Serchhip AC, 27-Tuikum AC leh 28-Hrangturzo AC te vil-a Expenditure Observer ni tura Election Commission of India in a ruat Umesh Chandrakant Phade IRS hi Sawrkar Official te, Political Party te, Candidate leh mipui mimir, inthlan senso kaihhnawiha zawhna nei te chuan Phone Number 8731864197-ah biakpawh theih a ni dawn a ni.