Kuthnathawktute chawikan leh leirem an rah theihna turin SEDP a kalpui mek a ni - Tawnluia

Deputy Chief Minister Tawnluia chuan Sawrkarin kuthnathawktute chawikan leh leirem an rah theihna tura SEDP a kalpui mek thu sawiin, First Phase-ah mi 60,000 tan First leh Second Installment an sem zo tawh tih a sawi a, “Third leh Fourth Instalment leh a tul angin Rs 3,00,000 thleng pawhin kan inpe dawn a ni,” a ti.

Horticulture Department buatsaiha Sapthei zamna thirzai, Galvanised Iron Wire (GI Wire) semna hun nimin zing-a Khawhai Town Hall-a neih a hmanpuina ah Deputy Chief Minister Tawnluia chuan Sawrkar in kuthnathawktute chawikan leh leirem an rah theihna tura SEDP a kalpui mek thu sawiin, hemi hnuaiah hian Trade hrang hrang dah a nih thu leh ram leilung behchhana eizawnna leh intodelhna siam chu ngaihpawimawh a nih thu a sawi a. SEDP chu COVID-19 in harsatna namenlo a thlen avangin kum 2 chhung hmalak a rem loh thu leh ruahman ang pawha hmalak chak a nih theih loh thu sawiin, tunah chuan SEDP pawh kalpui chhoh mek zel a lo ni ta tih a sawi a. “SEDP Phase-I kan thlang zo tawh a, mi 60,000 tan First leh Second Installment kan sem zo tawh a, Third leh Fourth Instalment leh a tul angin Rs. 3,00,000 thleng pawhin kan inpe dawn a ni,” a ti a. “SEDP Phase-II beneficiary pawh kan thlang fel leh tawh a, tanpuina First Installment pawisa pawh kan pe leh thei tep tawh a ni,” tiin mipuite chu mahni hmazawn theuha mawhphurhna tla te hlenchhuah tum tur leh an tana sawrkarin program pawimawh tak tak a duante tihlawhtlingtu nih tum theuh turin a chah a ni.

Khawhai khua ah hian kum 2003 atang khan tih tak takin Sapthei chin hi bul tan a ni a, hemi kum hian Horticulture Department hmalakna in chhungkaw 200 in bul an tan a, kum 2006 atang khan natna leh a hralhna avanga harsatna tawkin mi tam tak chuan an chhunzawm ta lo a. A zamna thirzaite a mawih chhiat tawh avangin pandal system-a ti tawh lo in Fencing System-in an ching a. Sapthei hi Kg. ah Rs. 70-80 in an hralh reng a ni.

Nimin-a he hun hmanna ah hian Sapthei zamna tur GI Wire quintal 333 (666 Rolls) sem niin heng te hi Rs. 33,30,000/- man a ni a. Heng GI Wire-te hi Horticulture Department leh IFAD FOCUS Convergence hnuaia hmalakna niin mi 111 te hnenah sem a ni a, beneficiary pakhat zelah quintal 3 (Coil 6) theuha sem a ni.