Inthlanpui atan Mamit District inbuatsaihna enpui

Mizoram Chief Electoral Officer (CEO) Madhup Vyas chuan nimin khan Mamit tlawhin Mizoram Election 2023 neih tura Mamit District inbuatsaihna hrang hrangte a enpui a, Mamit District Election Officer leh District Bawrhsap VL. Remliana bakah Mamit District chhung Assembly Constituency pathum-a ERO leh AERO bakah Election Officer-te a kawm bawk.

CEO chuan kumin Election kan neih turah Elections Officials-te chu ECI duhdante lo zirchianga, mipui a tam thei ang berin vote an thlak theih dan turte leh inthlanna felfai leh thianghlim a awm theih nana theihtawpchhuah turin a fuih a. Strong room sak thar, EVM dahna Warehouse, Counting Hall tura ruahman pathum te leh Polling Officials-te Dispatch leh Reception hmun turte tlawhin a endik nghal a ni.

Election Officials te'n ruahmanna an siam hunah EVM a that leh that loh endikna ah Political party hrang hrang aiawh te chuan First Level checking neih tur a ni dawn a. EVM an neih zawng zawng atanga za zela pakhat ah vawi 1200 vote thlak chhin a ni anga, za zela pahnih ah vawi 1000 thlak chhin leh tur niin, chu bakah za zela pahnih dang lehah vawi 500 thlak chhin a ni leh anga, heng a Vote tla zat leh VVPAT in a lo chhinchhiah zat a inmil em tih endik leh vek a nih dawn thu he hunah hian tarlan a ni. Nimin-a EVM Warehouse endikna ah hian Political Party aiawhte pawh an tel bawk a ni.