Aizawl Sahuan a changtlung sawtin tlawhtu pawh an thahnem sawt hle - EF&CC Minister

Environment, Forest and Climate Change Minister TJ. Lalnuntluanga leh Journalist thenkhat te chuan Inrinni khan Aizawl Sahuan tlawhin Minister chuan Aizawl Sahuan chu a changtlung sawtin tlawhtu pawh an thahnem sawt hle tih a sawi a, dan lova ramsa leh sava phurh man te pawh Aizawl Sahuan-ah hian dahluh thin a ni bawk.

EF&CC Minister TJ. Lalnuntluanga chuan Aizawl Sahuan chu a changtlung sawtin tlawhtu pawh an thahnem sawt hle tih Journalist te hnenah hian sawiin, tunhnaia Animal Exchange Program hmanga Sakei pahnih dahluh a nih hnu phei chuan tlawhtu an thahnem lehzual tih aa sawi a. Sahuan-ah chuan ramsa te dahluh tur awm nual mahse hmunhma zau zawk neih a nih loh avangin dahluh mai a remchang thin lova, tunhnaiah Master Plan of Aizawl Zoological Park 2019-29 chu Central Zoo Authority in Condition neia approval a rawn pek thu sawiin, thawmthat leh cheibawl ngaite cheibawl a, hmunhma zau zawk neih belh a nih hnu phei chuan Sahuan changtlung tak a la ni chho dawn tih a sawi a. “Sahuan pangngai kan nei hi a lawmawm, a hmun zauhna turin hmalak mek a ni a, Sakeibaknei dah thleng pawhin rilru-ah a awm,” a ti bawk.

Minister hova Journalist ten Aizawl Sahuan an tlawhna ah hian Deputy Conservation of Forest (Wildlife) PC. Laltanpuia chuan Report pein Aizawl Sahuan-ah hian ramsa te awmhranna tur bik hi tun dinhmun ah hmun 29-ah siam a ni a, Native Species leh Exotic Species (Mizoram chhunga awm ngailo) te an awm nual thu sawiin, Exotic Species phei chu 49 lai an awm a. Keipui (Royal Bengal Tiger) dahluh a nih hnu leh Exotic ramsa te lakluh an nih hnu phei chuan tlawhtu an pun belh hle a, report-a a lan danin April 2022-May 2023 chhungin tlawhtu mi 63,037 an awm a, an sum hmuh zat pawh Rs 14,66,820 a tling bawk.

Aizawl Sahuan tia hriat, Zoological Park, Sakawrtuichhun hi November ni 24 2006-ah hawn niin, Enclosure (ramsa te chenna tur bik) 29 siam a ni a, Breeding Centre (inthlahpunna atan bika hmun siam) 4 a awm bawk. Sahuan hi a theih anga tih changtlun chhoh zel a ni a, Zoo Animal Exchange Program hnuaiah Central Zoo Authority phalna in State dangte nen ramsa lakluh leh pek chhuah thin a ni bawk. Exotic Species-ah phei chuan India ram Sahuan danga vang em em Cassowory bird te, Patas Monkey leh ramsa chi hrang hrang an awm nual a ni.

Inrinni-a Aizawl Sahuan tlawhna ah hian Forest Department hotute pawh an tel a ni.

Aizawl Sahuan-a ramsa te ei leh in-a sen a tam

Aizawl Sahuan a Sakei pathum (3) ten ni khat-a an ei ral chu Bawngsa kg 27 niin kar khat ah ni khat chaw nghei tir thin an ni a. Ramsa chaw atan senso tam mah se Sahuan changtlung leh tlawh tham tak buatsaih zel an tum tih Forest Minister TJ. Lalnuntluanga chuan a sawi. Inrinni a Journalist ten Aizawl Sahuan an tlawhna ah Aizawl Sahuan enkawltu Aizawl Zoo Director sawi danin, Sahuan a ramsate tan hian ramsa chaw supplier awmin, Open Tender chhuah hnuah DPAB kaltlangin Zoo Feed Supplier tur thlan \hin a ni a. Supplier te hian Department lamin thla khat chhunga ramsa te ei tur mamawh zat (feed requirement) an siam an supply \hin a. A tlangpuiin thla khat chhung in ramsa leh sava ten Rs. 9,00,000 man hu vel an ei \hin a ni. Keipui pathum te ni khat ah sa kg. 27 pek \hin an ni a, chumi atan chuan kar khat ah Rs. 97,000 bawr vel sen \hin a ni.

Aizawl Sahuan-ah hian ramsa leh sava dan lova phurh an man te chu Court thuchhuak angin dahluh \hin an ni a, an ei turte chu Department in a supply \hin a. Exotic ramsa leh sava te hian thla khat chhungin Rs. 1,30,000 man vel an ei \hin bawk. Exotic ramsa Sahuan a dah tawh zawng zawng zat chu 913 niin 666 an thi tawh a, a la dam 213 enkawl mek an ni. Ramsa thi te hi postmortem zel thin an ni.


Comments

Popular News (Last 30 Days)

Vawiin-ah HSSLC Exam result

LPG man bithliah thar