Lenkawl

Serchhip District chhung khaw pahnih a Sazuk kaptu a puh mi paruk te chu nimin khan Serchhip District Court-ah an thubuai ngaihtuah niin thla thar May 7-ah an thubuai hi ngaihtuah leh tura tih a ni.

Khawvel pum-a Consumers te dikna leh chanvo humhalh a pawimawh zia inzirtirna ni, ‘World Consumer Rights Day 2024’ chu nimin khan khawvel hmundangte rualin Serchhip-ah pawh hman a ni a, he hun hi Serchhip District Bawrhsap David Lalthantluanga chuan khuallian niin a hmanpui a ni.

Nu naupai ten him leh tha taka nau an neih theihna tur atan nau chhar dan inzirtirna ni 2 awh tur chu nimin khan Serchhip-a CMO Conference Hall-ah neih a ni.

SUBJECT HAR - PM POSHAN (MID DAY MEAL) - Jacinta Vanlalengzami Headmaster, A&M Granchild School North Vanlaiphai

Election Commission of India chuan Lok Sabha inthlan neih hun tur chu Vawiin hian a puang dawn a. New Delhi-a Vigyan Bhawan-ah inthlan hun hi puan a ni anga, Lok Sabha inthlan rual hian State thenkhata Assembly inthlan hun tur pawh puan nghal a ni ang. Tuna Lok Sabha kal lai mek term hi kumin June ni 16-ah a tawp dawn a. Kum 2019 khan Lok Sabha inthlan kha thawh sarih a neih niin April atanga May thla inkarah neih a ni. Lok Sabha-ah hian Seat 543 awmin inthlan hmasa ah khan BJP in Seat 303 an la a ni.

Lai Autonomous District Council (LADC)-a Chief Executive Member (CEM) V. Zirsanga'n tun thla ni 7-a banna a thehluh chu Governor in a pawm hnuah LADC enkawltu tur (Caretaker) atan thla ruk (6) chhung atan Lawngtlai District Bawrhsap chu nimin khan a ruat. Tarlan tawh angin LADC-a MDC 25 zinga 13 te chuan CEM nilai chuan thlawptu a ngah tawk lo tih an sawi hnuah CEM nilai hian banna a thehlut ta a ni.

Mizoram Co-operative Siamtha Pawl (MCSP) chuan nimin khan Aizawl Press Club-ah thuthar thehdarhtute kawmin, Sawrkar Laipui in rampum intodelhna atan Society te hmanrua atan hman a tum angin, Mizoram sawrkar chu Cooperative Society-te chu tangkai zawka hmang turin leh chumi tur chuan Society hrang hrangte pawh hman tlaka lo inbuatsaih turin an in chah tih an sawi.

UD&PA Department changtu Home Minister K. Sapdanga chuan nimin khan Lunglei a HPC Pisa-ah thuthar thehdarhtute kawmin Lunglei chu Developemental Structure pahnih, High Powered Committee leh Lunglei Municipal Council in a vil hi chu lawmawm a tih thu a sawi a, tun Sawrkarah hian hmasawnna nasa zawk an hmuh ngei a beisei thu a sawi bawk.

Mizoram Sawrkar hnuaia Pharmacists te intel-khawmna pawl - Mizoram Government Pharmacists’ Association chuan nimin khan Dawrpui Multipurpose Centre Committee Room-ah General Conference vawi 16-na hmangin Health Minister Lalrinpuii chuan a hmanpui a, Pharmacists-te pawimawhna leh damlo enkawlna kawnga an thawhhlawk dan leh mipui tana an tangkai zia te sawiin, Hriselna huanga thiamna leh tih dan thar lo chhuak zel mil a inherrem turin a chah a. National Health Mission hnuai a sawrkar Policy ngaihpawimawh tak zinga mi, Telemedicine-ah pawh hmalakna tha zawk an neih theih nan thawh-puiah a sawm nghal bawk.

PWD Minister Vanlalhlana leh P&E Minister F. Rodingliana te chuan nimin zing khan sawrkar Flagship Programme hnuaia thlai thar dahthatna tur atan Zuangtui-a PWD, Commerce & Industries leh P&E Department hmunhma te chu an enfiah a. Minister-te chuan sawrkar-in Handholding Policy hnuaia thlai chi hrang pali a dah - Sawhthing, Aieng, Hmunphiah leh Hmarchate chu rei zawk dahthatna tur atan an Department hnuaia hmun-hma hrang hrang enfiahin, rei zawk dahthat dan tur, Dry Storage leh Process anih theih dan tur te an sawiho a ni. Thlai dahthatna atan hian PWD Mechanical Sub-Division-II Workshop te, Bamboo Processing Factory Industrial Estate-te, Common Facility Centre-te leh P&E Department hmunhma hrang hrangte chu tangkai taka hman anih theihna turin thlithlaia enfiahna neih a ni.