Serchhip-ah District Bawrhsap hovin ‘World Consumer Rights Day 2024’ hman a ni

Khawvel pum-a Consumers te dikna leh chanvo humhalh a pawimawh zia inzirtirna ni, ‘World Consumer Rights Day 2024’ chu nimin khan khawvel hmundangte rualin Serchhip-ah pawh hman a ni a, he hun hi Serchhip District Bawrhsap David Lalthantluanga chuan khuallian niin a hmanpui a ni.

Serchhip DC Conference Hall-a World Consumer Rights Day 2024 puala hun hman ah hian Bawrhsap David Lalthantluanga chuan kum 1983 atangin Consumer Rights Day chu hman a ni tih sawiin, mitin te chu Consumers kan nih vek thu leh thil zuara hralhtu te pawh mamawh lei ngai kan nih avangin Consumers kan ni tih a sawi a, hei vang hian kan dikna leh chanvo te kan hriat a pawimawh thu sawiin, hemi kawngah hian nasa zawka inzirtirna kalpui chu a la tul thu leh Consumer Rights Day chu Consumer te dikna leh chanvo te inhrilhhriat thar lehna hun hlu tak a nih thu a sawi a. Kan nitin mamawh hrang hrang siamtute lakah pawh kan dikna chanvo humhalh tur kan neih thu sawiin, tunlai khawvel hmasawnna chak tak karah sumdawngte leh a leitu te inkarah inlaichinna tha tak awm chhoh zel a tul thute, tunlai internet khawvel ah inbumna nasa karah mipui (Consumers) te fimkhur a pawimawh thu te sawiin, tunlai khawvelah Artificial Intelligence (AI), khawl thluak nei kan hman nasat leh lar tak te a tangkai leh a that rualin, a chhe zawnga hman theih anih thute a sawi a, fimkhur a tul thu a sawi bawk a ni.


Kumin-a World Consumer Rights Day-ah hian thupui atan ‘Fair and responsible AI for consumers’ tih chu thupui-ah hman niin he ni puala Serchhip-a hun hman hi Serchhip District Consumers Association (SDCA) President PC. Vanlalluna chuan a kaihruai a, SDCA-a Secretary leh Govt. Serchhip College-a Asst. Professor Laldinpuia chu Resource person atan hmangin he ni thupui hmang hian kalkhawmte zirtirna a pe a, thil leitu leh midang service hmangtu zawng zawngte hi Consumer kan ni vek tih sawiin, Khawl thluaknei (AI) nena cheng ho kan nih tawh avang hian kan chanvo humhalh tura theihtawp kan chhuah hi a tul thu te a sawi bawk.

Nimin-a he hun hmanna ah hian DCSO Office-a thawktute leh Retailer bakah VC leh YMA hruaitute an tel a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man