Lenkawl

Ni thum chhung awh tur ‘Young Voters' Festival’ chu nimin khan Govt. Serchhip College-ah neih tan a ni a, Serchhip-a Election Officer Lalrinsanga Hnamte chuan he Festival hi hawngin Serchhip District SVEEP Mascot chu he hunah hian phochhuah nghal a ni.

BJP Mizoram chuan Mizoram Legislative Assembly inthlanpui 2023 lo awm tur atan Constituency 23-a an Party Official Candidate tur nimin khan an puang a, Serchhip Bial-ah K. Vanlalruati chu a ding dawn a ni.

ZPM Party chuan nimin khan Serchhip-ah ‘Tawngtai Retreat’ an nei a, he hunah hian Ser-chhip bial-a an Candidate tur leh ZPM Leader Lalduhoma chuan thu a sawi a ni.

Mizoram Legislative Assembly Inthlanpui neih tura chuh turin nimin khan Serchhip District-a Assembly Bial pathum (3)-ah mi pakhat theuh ten Nomination Paper an thehlut leh a, heti hian Serchhip District-a Bial pathum-ah mi pali (4) in Nomination Paper an thehlut ta a ni.

Mizoram Assembly Inthlanpui neih tura Serchhip District chhunga Vote thlakna atana hman tur Electronic Voting Machine (EVM) chu nimin khan thliar fel a ni.

All Mizoram CSS Employee Co-ordination Committee (AMCECC) chuan nimin khan thuchhuah siamin Mizoram inthlanpui kan neih ah eng party pawhin sawrkarna lo chang se CSS hnuaia hlawh tlem tak leh rimtaka thawkte ham-thatna tur Special Scheme tihhlawhtlin sak ngei turin an ngen tih an tarlang.

HIV Positive pawl Mizoram State Positive Network (MSPN+) leh Project AHANA NCPI+ te hmalaknain nimin khan a vawi khatna atan HIV Positive hmeichhiate zingah Cervical Colposcope Screening neih a ni a, hmeichhe 17 in screening hi an nei a ni. Cervical Colposcope Screening hi Alpha Hospital, Kulikawn-ah neih niin HIV Positive kalkhawm mi 20 zingah HIV positive te tan Sexual Reproductive Health leh Chhul Cancer chungchang zirtir an ni bawk.

Mizoram Legislative Assembly inthlanpui lo awm tur atana inpuahchahna kal zelah niminpiah khan State Police Officer te tan DGP Conference Hall, Police Hqrs., Aizawl-ah inzirtirna neih a ni a, he hunah hian Intelligence Bureau Joint Director (Consultant) Balbir Singh leh Deputy Inspector General Navneet Kumar Mehta bakah Assistant Director Desh Raj Bhatao te chuan Inthlanna felfai leh muanawm tak a awm theihna tura Police force te mawhphurhnate an zirtir a ni.

Mizoram State Museum buatsaih Museum Exhibition leh Awareness Campaign chu nimin khan Govt. Gandhi Memorial H/S Champhai-ah District Bawrhsap James Lalrinchhana chuan a hawng a, Champhai District chu Pipute sulhnu pawimawh tak tak awm tamna a nih avangin Museum Awareness neih a pawimawh thu leh Pipute sulhnu hrang hrang hmuh tur mahni hmun ngeia a awm chuan Mizo Culture hriatthiamna a thlen a, Mizo nunze mawi hriat rengna a hnutchhiah tih a sawi a, Mizo history te, hmanrua an lo hman thin leh thuam an inbel thinte zirna hmun atan Museum chu thil pawimawh tak a nih thu a sawi bawk. Mizoram State Museum, Arts & Culture Department-a Curator C. Lalrinfela chuan Govt. GM H/S chu Mizoram-a Museum nei hmasa ber School an nih avangin Museum Exhibition buatsaih a nih thu a sawi a, Museum chu zirna run pawi-mawh tak a nih thu a sawi bawk.

Mizoram Kohhran Hruaitute Committee (MKHC) chuan Mizoram in Inthlanpui a hmachhawn mekah Zawlnei der leh Zawl thupuan hnawl nachang hre turin mipuite an chah.